Di çarçoveya Roja Cîhanê ya Kobanê ku ji aliyê gelek navdarên cîhanê ve hate ragihandin de îro li Kopenhaga paytexta Danîmarkayê çalakiyeke berfireh pêk hat.

Çalakî û meş bi pêşengiya Federasyona Komeleyên Kurd ên Danîmarka FEYKURD’ê pêk hatin. Her wiha ji partiyên siyasî yên Danîmarkayê Enhedslisten jî piştgirî da çalakiya Kurdan. Nûnerên bajarê Gladsaxe yê Partiya Gel a Sosyalîst û nûnerên partiya Enhedslistenê yê bajarê Brøndby beşdarî çalakiyê bûn û destek dan çalakiya Kurdan.

Çalakiya bi armanca piştgiriya ji bo Kobanê bi beşdariya zêdetirî 4 hezar kesî pêk hat. Meşa girseyî  saet di 13.00 de ji Parka Enghave destpê kir û heta Vesterbo Torvê berdewam kir. Çalakî bi mîtîngekê bi dawî bû.

Li ser navê Partiya Eva Flyverholm axivî û berxwedana Kobanê silav kir û ji hikûmeta Danîmarkayê xwest ku li gel gelê Kurd cih bigirin.

Li ser navê partî û rêxistinên destek dan çalakiyê û tevlî çalakiyê jî bûn axaftin hatin kirin.,

Axaftinên ji aliyê nûnerên FEYKURD, Komala, PYD, YNK û Goran ve hatin kirin, bi dirûşiman dihatin birîn. Di çalakiyê de peyamên têkildarê 1’ê Mijarê Roja Cîhanê ya Kobanê hatin xwendin.

Sazî û rêxistinên destek dan çalakiyê: PYD, PJAK, Fokus-A, DKAF, Kurdisk Hus i Odense, Yekîtiya Hunermandan Kurd, Dansk Kurdisk Kvindeforening, Hillerød Kurdisk Kulturforening, Kurdisk Ungdom, Enhedslisten, GORRAN, YNK/PUK, SF-Gladsaxe, Enhedslisten Brøndby, Komitey Danmarki- Komala Zahmatkeshani Kurdestan, Horserød Stutthofforeningen, Fredsvagten ved Christiansborg, OPSAK (Odense Pir Sultan Abdal Kulturforening), Nazim Hikmet Kulturforening.