Berdevkê Însiyatîfa Sûriyê ya azadiya Rêberê Gelê Kurd Abdullah Ocalan Menan Cefer, têkildarî Komploya 9’ê Cotmehê ya li ser Rêberê gelê Kurd Abdullah Ocalan û pêngava ‘Ji Abdullah Ocalan re azadî, ji pirsgirêka Kurd re çareseriya siyasî’ ku salek li du xwe hişt ji ANF`ê re axivî.

‘PIRSGIRÊKA KURD BÛ PIRSGIRÊKEKE CÎHANÎ’

Cafer, diyar kir ku pêngav gihîşt armancên gelekî mezin û wiha got, "Însiyatîfa ji bo azadiya Rêber Apo a fîzîkî dengek xurt li cîhanî veda. Gelek sazî û rêxistin, gelek kesayetên pêşverû, demokrat, akademîsyen, siyasetmedar, şîrovekar û fîlozof bersiva vê pêngavê dan û bi çalakiyan dewleta Tirk şermezarkirin. Tenê li Birîtaniyayê serokê sandîkaya karkeran milyonek kes daketin kolana û dewleta Tirk û kiryarên wê yên dermirovî şermezar kirin. Her wiha li Fransa, Îtalya, Yuwnanê û gelek dewletên Ewropa û Emrîka tevlî vê însiyatîfê bûn. Salek li ser vê pêngava azadiyê re derbas bû, lê mirov dikare bîne ziman ku êdî pirsgirêka Kurdî bûye pirsgirêkeke cîhanî û navnetewî ku bi rastî hêzên demokrat û şoreşger yên behsa mirovahiyê û azadiyê dikin, piştgirî û palpiştiya xwe didin vê însiyatîfê. Felsefeya Rêber Apo ji xwe ra kirine rêya rizgarkirina mirovahiyê.

Ev tê wê wateyê ku piştî hilweşandina sosyalîzma avakirî tu kesî pêşengî ji bo gelê bindest û ji bo gelê azadîxwaz yê ku dixwazin şoreşên civakî bi şêwazên siyasî bi dest bixin an jî pêk bînin li cîhanê nema. Ji ber kapîtalîzm û hêzên hegemon û desthilatdarî bi hemû şêwazên teknolojiya nûjen mejiyê mirovan xwar in. Têknolojî êdî gihîştiye astekê ku mirovan pê dikujin. Mînak li Lubnanê berbiçave. Bi sedan bi hezaran navend çêkirine ku meylên mirovan û civakê nas bikin û li gorî wê jî bersivê didin.”

‘EM PIŞTGIRIYA GELÊ AMAZÎXAYÊ SILAV DIKIN’

Cafer, berxwedana gelê Amazîxî silav kir ku tevlî pêngavê bûne û wiha got, “69 kesên ku xelata Nobelê standine nameyek ji sekreterê YN`yê û civîna wezîrê derve yên Ewropa re şandin. Li ser vê yekê neçar man li hev bicivin. Însiyatîfê bi helwest û çalakiyên xwe zextek mezin li ser wan çêkir. Beriya ku Rêber Apo bê dîlgirtin gotibû, ev sîstem wê hilweşe. Îro em dibînin bi rastî jî li hemberî heqîqeta jiyanê sîstema heyî yek bi yek hildiweşe.”

Cefer, anî ziman ku Rêber Apo kilîta çareseriya Rojhilata Navîn û tevahî cîhanê ye û wiha pêde çû, "Rêber Apo mijara ekolojî derxistiye ronahiyê, mijara çareserkirina bindestiya jinê û çawa azad bibe derxistiye holê. Em îro dibînin tevgera jin li hemû cîhanê dirûşmeya Rêber Apo berz dikin. Piştî qetilkirina Jîna Emînî li Rojhilatî Kurdistanê û Îranê dirûşmeya ‘Jin Jiyan Azadî’ hat berzkirin û li tevahî cîhanê jî belav bû. Ji ber wê îro her kesê ku qala maf û edaletê dike li dora vê pêngava azadiyê bûne yek.”

Cafer, anî ziman ku Rêberê Gelê Kurd Abdullah Ocalan bi rêya parêznameyên xwe hemû tişt anî ziman û rastiya veşartî ji nûve nivîsandiye û wiha domand, "Vaye bi sedan fîlozof felsefeya Rêber Apo dixwînin û li nava tevahî civakan tê şirovekirin. Tê de qala mijara dewletê û avakirina Sumera û avakirina çîn û tebeqan dike. Pêwîste ev çînatî ji hole rabe û ji komînan pergal destpê bike. Demokrasiya ku niha dewlet qala wê dikin ne demokrasiyek ku xizmeta civakê bike ye, her tişt berovajî kirine û li gorî berjewendiya xwe bikar tînin. Mînak dewleta Tirk jî dibêje ez demokrat im. Dema ku Rêber Apo mafê siyasî xwestî, rûyê wan yê rast derket. Yên weke Brîtanya û Emrîka, Yuwnan û Rûsiya ketin erdê."

Menan Cefer, anî ziman ku Rojava bi fikr û felsefeya Rêber Apo xwe bi rêxistin dike û wiha got, “Dema ku em dibêjin ‘Bê Serok jiyan nabe’ ev dirûşme gelek kes bi şêwazekî klasîkî digrine dest. Na berovajî wê em bi şêwazekîrasteqîn û pratîkî digrin dest. Ji ber ku xwendina parêznameya Rêber Apo dikare rastiyê derxîne holê. Hemû hêzên emperyalîzm û bi taybet jî dewleta Tirk hewl didin rastiya xwe veşêrên. Bi deh hezaran zanyarên wan di nava xebatê de ne, da ku rastiyê binixumînin. Bi hişê ciwana û bi hişê hêza ku civakê bi rêve dibe, dilîzin. Kesayeta mirovan di sîstama kapîtalîzmê de tenê dibêje tu eleqa min bi tiştekî tune, ev jî armanca kapîtalîzmê ye û bi vê rengî jî civakê bilerizîne."

‘EM Ê AZADIYA FÎZÎKÎ YA RÊBER APO MISOGER BIKIN’

Cefer têkildarî şert û mercên li Îmraliyê jî ev tişt anîn ziman, “Şert û mercên herî dijwar li ser Rêber Apo pêk tînin. Nelson Mandêla jî ku bi salan hatibû girtin jî, lê mafê wî yê hevdîtina bi parêzeran re, ne hat birîn. Lê yê Rêber Apo berovajî wê ev bû 43 meh in Rêber Apo di bin goşegiriyekê de ye. Hem êrîşeke li ser raman heye û hem jî di aliyê fîzîkî de. Lê em ê li dijî vê pergalê her rabin ser piyan û em ê azadiya fîzîkî ya Rêber Apo pêk bînin. Hêza me heye û em ê bi wê hêza xwe jî azadiya fîzîkiya Rêber Apo misoger bikin.”

‘KURD JI TEVAHÎ CÎHANÊ RE BÛ PÊŞENG’

Cafer, da zanîn ku di komploya 9’ê Cotmehê ya navneteweyî de dora 36 dewletên kapîtalîst cihê xwe girtine û got, “Ji ramanên Rêber Apo tirsiyan û ew piştî dîlgirtinê radestî dewleta Tirk hat kirin. Komplo berdewam dike ew jî bi rêya sîstema êşkenceyê û astengkirina hevdîtina parêzer û malbatê ye. Komîteyên ku ji derve tên dixwazin bi Rêber Apo re hevdîtin pêk bînin, lê dewleta Tirk bûye kelem li pêşiya wê. Rêveberiya Xweser li Bakur û Rojhilatî Sûriyê li hemberî pênc hêzên serdest li ber xwe dide. Dewleta Tirk di sala borî de tevahî jêderên jiyanê bombebaran kirin û bi milyaran ziyan gihandin gelê me. Mirov dikare bêje komplo li ser tevahî Rojhilata Navîn berdewame. Lê Rêber Apo bi sekna xwe komplo têk bir û pûç kir.

Cefer, di dawiyê de got, “Pêngava me gihîşt armanca xwe û li 74 navendan û her wiha jî li hemû cîhanê jî tevahî kesên demokrat serî hildan. Civaka azadîxwaz zextê li CPT dike û ev yek jî plana dewleta Tirk a dagirker û piştevanê wê derdixîne holê. Divê em jî hemû dem û hêza xwe ji bo vê têkoşînê seferber bikin. Divê tevahî cîhan û gelê azadîxwaz êdî li hemberî vê sîstemê rabin. Em ê li dijî vê sîstemê serî hildin. Vaye ev sîstem li her çar parçeyan hildiweşin. Dawî li wan tê û ew jî bi fikra Rêber Apo ye û em ê jî bi wê fikrê bi serbikevin. Di çarçoveya pêngava azadiyê de em ê kampanyayên nû bidin destpêkirin.”