Radyoya Dengê Jiyanê ku li seranserê hemû bajarên Bakur û Rojhilatê Sûriyeyê weşanê dike, xwedî toreya weşan û nûçegihanane û navenda wê Hesekê û Reqayê ye, ev 6 sal in bi zimanê Erebî weşanê dike. Yek ji endamên damezrandina Radyoya Dengê Jiyanê û her wiha Rêvebera wê Sozda Ehmed, der barê pêvajoya ji avabûna radyoyê heta roja îro ku di sala xwe ya 7’emîn de ye ji ANF'ê re axivî.

DI SALA 2017’AN DE JI BO DAMEZRANDINÊ AMADEKARÎ DESTPÊ KIRIN

Sozda Ehmed, anî ziman ku ji bo vebûna Radyoya Dengê Jiyanê di sala 2017’an de xebat dane destpêkirin û wiha got, “Li Rojavayê Kurdistanê weşana radyoyê bi kadroyên xwe di şert û mercên teng de di sala 2012’an de destpê kir. Di van salan de radyoyên ku bi zimanê Kurdî weşanê dikirin, pir kêm bûn. Bi rêya radyoya herêmî, di nûçeyên Kurdî yên dihatin weşandin de, de behsa dîroka Kurdan û taybetemendiyên herêmê dihate kirin.

PÊDIVÎ BI RADYOYEK KU XÎTABÊ GELÊ EREB BIKE, ÇÊBÛ

Li herêmê şer gelek berfireh bûbû û her roj bajarek ango herêmek dihate rizgarkirin. Piştî rizgarkirina bajarên ku bi giranî gelê Ereb lê dijîn, pêdivî bi radyoyek ku bi zimanê Erebî weşanê bike çêbû. Gelê Ereb, gelekî ku bi xwezayê û axê ve girêdayî ye. Ji ber vê piraniya demên xwe di nava xwezayê de diborandin û eleqeya wan a li hemberî radyoyê zêdetir bû. Pêşî ji bo radyo dest bi weşanê bike, hewcehî bi kadroyeke xurt hebû. Em ne xwedî civakeke bi tecrûbe bûn. Ji bo radyoyê kesên di zimanê Erebî de serwer dîtin jî, ne hêsan bû. Ji bo temamkirina van kêmahiyan pêdivî bi perwerdehiyê hebû. Ji bo radyoyê 12 kadro nêzî 8 meh hatin perwerdekirin û zemîneke xurt hat amadekirin.”

WEŞANGERIYEK LI SER BINGEHA DÎROKA SÛRIYEYÊ 

Sozda Ehmed, da xuyakirin ku Radyoya Denê Jiyanê di 1’ê Tebaxa 2018’an de dest bi weşanê kiriye û wiha domand, “Ji ber ku dewleta Tirk di wê demê de li dijî Efrînê êrîşên dagirkeriyê dabû destpêkirin, pêvajoyek zehmet bû. Ji bo vê jî me weşangeriyeke ku li ser bingeha çand û dîroka gelên ku li Sûriyeyê dijîn, rastiya erdnîgariya Sûriyeyê û polîtîkayên dewletê yên li ser Sûriyê hatine meşandin, esas girtin. Di serdema perwerdehiyê de me bi rêya medyaya dîjîtalê dest bi xebatê kiribû. Lê di 1'ê Tebaxa 2018'an radyo dest bi weşanê kir. Piştî ku weşan destpê kir, em pê hesiyan ku guhdarvan zêde ne. Ev yek ji bo moral û motîvasyona me jî baş bû."

PÊŞÎ LI CIZÎR, REQA Û DÊREZORÊ DESTPÊ KIR

Sozda Ehmed, anî ziman ku weşan pêşî saet di navbera 07:00 û 22:00’an de hatiye kirin û got, "Di serî de radyoya me, li seranserî tevahiya Bakur û Rojhilatê Sûriyeyê, weşana xwe nekir. Li ser Cizîr û hin deverên navçeyên Reqa û Dêrezor weşanek hate kirin. Armanca me avakirina xebatkarên radyoyeke profesyonel bû. Me giranî da ser bernameyên siyasî. Her wiha me mijarên ku rojeva gel esas digirin û di bernameyên sibehê de bala gel dikişînin weşand. Piştre me dest bi pêvajoya bernameyên jin, zarok û ciwanan kir. Di sala 2022’yan de radyoya Dengê Jiyanê li seranserê Bakur û Rojhilatê Sûriyeyê bi awayekî 24 saetan dest bi weşana xwe kir. Ji ber bername û nûçe girêdayî çand û jiyana gel bû, bala wan dikêşa û dihate guhdarîkirin.”

ARMANC LI SER BINGEHA HEQÎQETÊ WEŞANGERIYE

Sozda Ehmed, diyar kir ku ji ber şerê giran ê ku li herêmên Bakur û Rojhilatê Sûriyeyê dihate meşandin, weşangerî ne tiştek hêsan bû û wiha dewam kir, “Ji ber şer û ambargoyê gelek car me nedikarî amûrên teknîkî peyda bikin. Ev yek dibû sedem car bi car weşan qut bibe. Li erdnîgariya Rojhilata Navîn her roj pêşketineke siyasî ya nû rû dide. Ev rastî dihat berçav girtin û li gorî wê bername dihatin amadekirin. Gelê ku dîrok û koka xwe nizanibe nikare siberoja xwe li ser hîmên rast ava bike. Ji bo vê jî di serdema pêş de em ê giranî bidin ser weşangeriya ku dîrokên bajar û gundên Bakur û Rojhilatê Sûriyeyê û çandên gelên li van gundan dijîn."