Bi hezaran koçberên Efrînê û welatiyên Şehbayê yên Kantona Şehbayê, li dijî êrîşên dewleta Tirk a dagirker ên li ser Bakur û Rojhilatê Sûriyê çalakiyek li dar xistin.

ŞEHBA

Çalakî ji qada Bazarê dest pê kir û ber bi çerxerêya Zeytûn ve bi rê ket. Li wir endamê Meclîsa bajarê Til Rifetê Reşîf Fetko êrîşên dewleta Tirk a dagirker û çeteyên wê yên li dijî sivîlan bi tundî şermezar kirin û soza şopandina rêya şehîdan û fikrên Rêber Apo nû kir.

Endama Meclîsa bajarokê Şêrewa Medîha Şêx Xelîl hevdîtina Rêber Apo bi malbata wî re pîroz kir, şehîdên berxwedanê bi bîr anîn û sîxurên ku xwe ji bo pereyan firotine dewleta Tirk a dagirker şermezar kirin.

Çalakî ji gundê Babinisê dest pê kir û ber bi qada Siwaqa ya bajarokê Fafînê ve bi rê ket. Li wir endamê Meclîsa Kampa Berxwedan Şoreş Îsa komploya navneteweyî ya li dijî Rêber Apo, êrîşên li dijî herêmê şermezar kirin.

Endama Meclîsa bajarokê Fafînê Meryem Saxir destnîşan kir ku êrîşên dewleta Tirk a dagirker û çeteyên wê yên li dijî herêmê dikevin xana sûcên şer.

Li gundê Kefer Qaris, koçberên Efrînê, şêniyên bajarokê Ehresê û kampa Serdem bi çalakiyekê êrîş şermezar kirin.

Hevserokê Kantona Efrîn û Şehbayê Bekir Elo, soza domandina berxwedanê li ser şopa Rêber Apo nû kir û diyar kir ku çareseriyên hemû pirsgirêkên Rojhilata Navîn di destê Rêber Apo de ne. Endama Meclîsa Malbatên Şehîdan a Kantona Efrîn û Şehbayê Xedîce Îbo diyar kir ku Rêber Apo çareseriya hemû pirsgirêkan e û got: "Dagirkeriya Tirk hevdîtina Rêbertî bi malbata wî re qebûl nekir, berê xwe da hedefgirtina sivîlên Bakur û Rojhilatê Sûriyeyê."

SAZÎ Û RÊXISTINAN BERTEK NÎŞAN DAN

Rêxistin û meclîsên Civaka Demokratîk ên kantonên Reqa, Tebqa, Dêrezor û Minbicê, Civaka Jinê ya Zenûbiya û malbatên şehîdan bertek nîşanî êrîşên dewleta Tirk a dagirker ên li ser Bakur û Rojhilatê Sûriyê dan û tekezî li ser yekîtiya li dijî dagirkeriyê kirin.

Rêxistin û meclîsên Civaka Demokratîk, Civaka Jinê ya Zenûbiya û gelên Bakur û Rojhilatê Sûriyê bi daxuyaniyên cuda êrîşên dewleta Tirk a dagirker ên li ser herêmê şermezar kirin.

DÊRAZOR

Rêxistinên Civaka Demokratîk ên kantona Dêrazorê bi daxuyaniyekê êrîş şermezar kirin. Daxuyanî ji aliyê hevseroka Rêxistinên Civaka Demokratîk ên kantonê Sece El Hiwêdî ve hat xwendin.

Di daxuyaniyê de bang li hêz û rêxistinên navneteweyî hat kirin ku van êrîşan bi dawî bikin û sînorekê ji dewleta Tirk a dagirker re deynin û got: "Em ê parastina xwe ya rewa bidomînin. Em ê bi nirxên xwe yên demokratîk ve girêdayî bin. Têkoşîna me ji bo pêşerojeke ewle û îstîqrar e."

Meclîsa Kombûna Jinan a Zenûbiya ya Kantona Dêrazorê bi daxuyaniyekê êrişên li dijî herêmê şermezar kirin. Di daxuyaniyê de hat diyarkirin ku ev şer, şerê qirkirina hemû gelan û pêkhateyan e. Ev êrîş dikevin xana sûcên şer.

Di daxuyaniyê de bang li hêzên navneteweyî hat kirin ku li hemberî herêmê xwedî berpirsiyarî bin.

TEBQA

Rêxistinên Civaka Demokratîk a Kantona Tebqayê bi daxuyaniyekê êrîşên li ser binesaziya herêmê şermezar kirin û gotin, “Ev êrîş nikarin vîna gelê Bakur û Rojhilatê Sûriyeyê bişkînin. Di daxuyaniyê de hat gotin, "Berdêla wê çi dibe bila bibe em ê axa xwe biparêzin."

REQA

Di heman çarçoveyê de gelê Kantona Reqayê li ber Nexweşxaneya Zarokan bi meşeke girseyî êrîş şermezar kirin. Meşa ku li vir destpê kir heta Qada Jina Azad berdewam kir. Endama Meclîsa Jinê ya Zenûbiya Îsra El Hesen li vir axivî û bertekên xwe yên li hemberî êrîşan anî ziman.

Hevserokê Komeleya Endezyarên Reqayê Seîd Mistefa jî diyar kir ku êrîşên dewleta Tirk a dagirker ên li dijî binesaziya herêmê ji bo wêrankirina herêmê ye. Mistefa bang li hêzên navneteweyî kir ku sûcên dewleta Tirk a dagirker rawestînin. Hevseroka Desteya Perwerde û Fêrkirinê ya kantona Reqayê Zelîxa Ebdî êrîşên li ser projeya demokratîk a herêmê şermezar kir.

Desteya Malbatên Şehîdan û Şehîdan a Kantona Reqayê jî bi daxuyaniyekê bertek nîşanî êrîşan da. Daxuyanî ji aliyê Berdevka Meclîsa Jinan a Desteyê Ebîr Hac Ebdullah ve hate xwendin. Di daxuyaniyê de bang li rêxistinên navneteweyî û saziyên hiqûqî hat kirin ku dest ji van sûcan berdin.

MINBIC

Li Kantona Minbicê, Meclîsa Kombûna Jinan a Zenûbiya ya kantonê bi daxuyaniyekê destnîşan kir ku hedefgirtina jinan, zarokan û binesaziya herêmê rûyê rastîn ê dewleta Tirk a dagirker e.

Rêxistina Partiya Yekitiya Demokratîk (PYD) ya kantonê bi daxuyaniyekê êrîşên li dijî herêmê şermezar kirin. Di daxuyaniyê de hat diyarkirin ku ev êrîş sûcên şer û dermirovî ne.

Rêxistinên Civaka Demokratîk û Meclisa Malbatên Şehîdan ên kantonê jî bi daxuyaniyên cuda êrîşên li dijî herêmê yên bi armanca pêkanîna projeyên dagirkeriyê û qirkirina gelan ku di encamê de metirsiyê didin seranserî xaka Sûriyeyê, şermezar kirin.

Di dawiya daxuyaniyan de hat gotin ew ê bi hevgirtinê êrîş û planên dagirkeriyê têk bibin.

GELÊ TIRBESPIYÊ: NIKARIN VÎNA ME BIŞKÎNIN

Pêkhateyên bajarê Tirbespiyê yê kantona Cizîrê bi meşekê êrîşên dewleta Tirk a dagirker ên li ser binesaziya herêmê şermezar kirin.

Çalakiya şermezarkirinê ya ku li ber Şaredariya Gel dest pê kir, ber bi Navenda Çand û Hunerê ya Hêzil ve dewam kir. Endama Kongra Star Xaliye Eyûb li vir axivî û diyar kir ku dewleta Tirk a dagirker bi hedefgirtina binesazî û çavkaniyên jiyanê yên herêmê hewl dide vîna gelê herêmê bişkîne û tolê hilîne.

Rêvebera Partiya Yekîtiya Demokratîk (PYD) a bajêr Nalîn Hisên jî diyar kir ku pêkhateyên herêmê wê li ser şopa şehîdan têkoşîna xwe bidomînin û got: “Êrîşên dewleta Tirk a dagirker nikare yekîtî û hevgirtina me têk bibe. Em ê hemû komployan vala derxin.”