Burak Çiftçi'yê ku bi bisîkletê xwe ji bo naskirina mutbexên cuda derketibû rê li hemberî berxwedana Kobanê xemsar nema û pedalên xwe ber bi Kobanê ve gerand. Çiftçî ragihand ku rojavayê Tirkiyeyê zêde ji Kobanê haydar nîne û wiha domand: "Li vir berxwedanek mezin heye" 

Berxwedana Kobanê di 50'î rojiya xwe de her ku diçe mezin dibe û didome. Her wiha ev berxwedan bala gelek derdoran dikîşine û bandorek mezin li ser wan dike. Burak Çiftçiyê ku beriya niha ji bo nasandina aşxaneyên cuda ji Stenbolê derketibû rê li hemberî berxwedana Kobanê xemsar nema û berê bisîkiletê xwe da Kobanê. 

Çifçi yê ku heya niha bi bisîkletê xwe li Ege û Derya Spî geriya, di 1'ê Mijdarê Roja Cîhanê ya Kobanê de beşdarî çalakiya li gundê Mehserê yê Pirsûsê bû. Çiftçî got ku ew 50 roj in pedal lêdide û li gelekî deveran geriyaye û herî dawî jî biryar daye ku bê Pirsûsê û piştgirî bide berxwedana Kobanê. 

Çiftçî ragihand ku di gera xwe de wî çavdêrî kiriye ku gelek kes ji berxwedana Kobanê haydar nînin û got ku di gerên xwe de berxwedan aniye rojevê û bi gelek kesan re parve kiriye. Çifçî wiha got: "Qebûl nakin ku her roj li vir mirov jiyana xwe ji dest didin. Dibe ku hîn li Ege û Derya Spî mirov dikevin behrê lê li vir di çavên mirovan de xemginî û rondik hene." Çiftçî ragihand ku di xemsariya li hemberî berxwedana Kobanê de para çapemeniyê zêde ye û wiha domand: "Van deran cuda radigihînin. Wekî ku têkoşîna gelê Kurd û PKK'ê tenê li hemberî Tirkiyeyê be didin nîşan. Lê li vir têkoşînek heye û zarokên vir zarokên şer in. Kurdan li gel hemû tiştî ti carî nasnameya xwe înkar nekirin."