Dîwana Hevserokatiyê ya KCDK-E daxuyanyeke nivîskî weşand û got, "Di vê demê de ku polîtîkaya bloka faşîst a AKP-MHP'ê ya li dijî demokrasiyê û Kurdan dijwartir bûye, Festîvala Mazlûm Dogan tê lidarxistin. Em di asteke bilind de tevlî festîvalê bibin, bi şiyara 'Serî hilde' berxwedanê geş bikin û bi vî rengî bersivê bidin."

Di daxuyaniyê de hate eragihandin ku Erdogan ê dîktator, polîtîkaya xwe ya şerê qirêj a li dijî Kurdan li Bakur, Rojava û Başûrê Kurdistanê girantir dike û hate gotin, "Tecrîda giran a li ser Rêber Apo jî bi rengê herî dijwar şidandiye û bi rebazên şerê qirêj êrîşê dibe ser hemû destketiyên gelê Kurdistanê. Dewleta Tirk a mêtinger ku li pêşberî têkoşîna azadiyê û gelê Kurdistanê tengav bûye, dixwaze bi konsepta şerê topyekûn bi ser bikeve.

Em bi berxwedana topyekûn pêşî li vê polîtîkaya kujer a dewletê bigirin. Di vê dema dîrokî de girîng e em ji her demê bêhtir yekîtî û rêxistiniya xwe xurt bikin û bi moral û motîvasyoneke bilind têkoşînê geş bikin.

Di demeke wiha de, Ciwanên Azad wê bi şiyara 'Li dijî faşîzmê serî hilde, Serokatî azad bike' roja 14'ê Tîrmehê 21. Festîvala Mazlûm Dogan li dar bixe. Wezîfeyeke me ya bingehîn e ku di vê pêvajoya dîrokî de beşdarî festîvalê bibin û têkoşîna hevpar xurt bikin. Çawa ku Mazlûm Dogan di nava tarîtiya faşîzma 12'ê Îlonê de bi berxwedana xwe ya destanî mêtingerî têk bir, divê em jî tevlî vê festîvalê bibin û têkoşîna hevpar geş bikin.

Bi navê KCDK-E em bang li hemû meclîs û xebatkarên xwe dikin ku ji bo 21. Festîvala Mazlûm Dogan a 14'ê Tîrmehê bixebitin, her kesî tevlî bikin û bi vê armancê seferber bibin. Em bang li gelê xwe û hemû hêzên şoreşger û demokrat jî dikin ku tevlî Festîvala Mazlûm Dogan bibin."