Jinên Kurd ên hunermend Ayşe Şan, Hozan Mizgîn, Leyla Bedirxan, Merziye Rezazî, Delîla û yên din li Almanyayê hatin bîranîn. Di şevbêrkê de hunermendan stranên xweş stran.

Yekitiya Hunermendên Jin ên Mezopotamyayê li bajarê Koln a Almanyayê bi şevbêrkekê  hunermendên jin ên Kurd ên ku jiyana xwe ji dest dane bi bîr anîn. Di şevbêrkê de strana “Sê Jinên Azad” a Delîla (Şenay Goçer) a ku di heman demê de gerîla bû hate strîn.

Ji endama lîjneya rêveberiya Yekitiya Hunermendên Jin Sûltan Oger diyar kir ku ev cara yekem e ku hunermendên jin ên ku jiyana xwe ji dest dane bi hev re tên bîranîn. Oger bal kişand ser girîngiya hunermendên jin ên kurd a ji bo mûzîk û zimanê Kurdî û got: “Di şexsê hunermendên me yên jin de dîroka jina kurd veşartî ye.”

Oger komkujiya li Parîsê pêk hat û di encamê de sê  jinên Kurd ên siyasetmedar Sakîne Cansiz, Fîdan Dogan û Leyla Şaylemez jiyana xwe ji dest dan şermezar kir û diyar kir ku ew ê weke Yekitiya Jinên Hunermend a Mezopotamyayê bi awayeke çalak tevlî kampanyaya “Em edaletê dixwazin” ya ku li Ewropayê ji bo her sê jinan hatiye destpêkirin bibin.

Di şevbêrkê de stranên jinên Kurd ên weke: Eyşe Şan, Hozan Mizgîn, Delîla Meyaser, Newal, Berçem, Leyla Bedirxan, Merziye Rezazî, Elmas Xan, Fatma Îsa, Fetane Welidi, Fewziye Mihemmed, Hozan Helbest, Nesrin Sherwan, Nurcan, Shilan, Sosika Simo, Xana Zaze  û Zadîna Şekir hatin gotin.