Nunertiya Kongreya Jinên Cîhanê ya Holandayê derbarê qetilkirina sê jinên Kurd li Parîsê de peyamek weşand û xwest hêzên li pişt komkujiyê bên aşkerekirin.

Kongreyê bal kişand ser hovitiya qetilkirina her sê jinên pêşeng ên tevgera azadiya Kurdistanê û diyar kir ku qetilkirina Sakîne Cansiz, Leyla Şaylemez û Fîdan Dogan windahiyek mezin bû. Kongreya jinan êşên jinên Kurd parve kir û xwest berpirên komkujiyê di demek zû de bên aşkerekirin.

Kongreyê ragihand ku ew piştgiriyê didin têkoşîna jinên Kurd û got: “Têkoşîna wana têkoşîna me ye.”

Bi armanca amadekariya Kongreya Duwemîn a Jinên Cîhanê ku dê sala 2016 li Asyayê pêk bê, dê roja 26’ê çileya 2013 Konferansa Ewropayê bê lidarxistin.