Kongreya Avakirinê ya Dersimê têkildarî şehadeta endama Koma Aştiyê Aysel Dogan daxuyaniyek weşand.

Di daxuyaniyê de hate gotin, "Hevrêya me, jineke wezîfeyê bû ku di têkoşîna azadî, wekhevî, aştî û edaletê ya gelê Kurd û civaka Elewî de berdêl da. Em gelekî li ber koça dawî ya hevala xwe ya têkoşînê, mezina xwe Aysel Dogan ketin."

Di daxuyaniyê de hate ragihandin ku Aysel Dogan, şert û mec, cih û war çi dibe bila bibe ti carî ji sekna xwe, ji têkoşîna xwe tawîz neda û hate gotin, "Jiyana wê ya li sirgûnê yan jî li zindanê derbas bû. Lê belê li her devera ku lê bû ji welatê xwe, ji gelê xwe û ji nirxên civakî ti carî tawîz neda."

Di daxuyaniyê de hate destnîşankirin ku Aysel Dogan bû yek ji nûnerên herî hêja yê nasnameya jinê û jiyaneke xurt li pey şopdarên xwe hişt.

Di dawiya daxuyaniyê de sersaxî ji gelê Kurd û bindestan re hate xwestin.