Şervana Yekîneyên Parastinê yên Jin (YPJ) Roşna Egîd ku 2’yê Îlona 2023’yan di êrîşa hewayî ya dewleta Tirk de li Rojava bû şehîd, li bajarê Lozan ê Swîsreyê konê sersaxiyê hat danîn.

Konê sersaxiyê li Navenda Civaka Kurd a Demokratîk (CDK-Lozan) hat danîn. Malbata Roşna Egîdê yên ji bo sersaxiyê hatin, pêşwazî kirin.

 ‘EM Ê LI TÊKOŞÎNA GERÎLA BIBIN XWEDÎ’

Destpêkê li ser navê Saziya Malbatên Şehîdan (KOMAW) axavtin hat kirin û bi pişt re rêz hat girtin. Hatîce Kandal ku li ser navê Yekitiya Jinên Kurd a Swîsreyê (YJK-S) sersaxî ji bo malbatê xwest, diyar kir ku dewleta Tirk bi taybetî têkoşîna jinên Kurd ji xwe re dike armanc û got: ‘’Ne tesaduf e ku jinên di xeta azadiyê ya Rêber Apo de têdikoşin, tên armanckirin. Li dijî van êrîşan li ser esasê azadiya jinan em ê li têkoşîna gerîla bibin xwedî.’’

 ‘SER LI BER JIYANA FEODAL RAKIR Û GIHÎŞT TÊKOŞÎNA AZADIYÊ’

Birayê Roşna Egîd û hevserokê CDK Lozanê Zulfu Bînbîr got: ‘’Di serî de Rêber Apo, bila serê gelê me sax be. Şehîdê me şehîdê Kurdan e. Roşna Egîd ser li ber jiyana feodal rakir û gihîşt têkoşînê û li çar aliyên Kurdistanê têkoşiya.’’

Zulfu Bînbîr anî ziman ku Roşna Egîd xeta berxwedanê ya Rêberê Gelê Kurd Abdullah Ocalan ji xwe re kiriye esas û wiha axivî: ‘’Îro ku ev xeta berxwedanê gaveke din jî nêzê biserketinê bûye, bi têkoşîna bi dehan salan a hevalên me yên Roşna Egîd e ku jiyana xwe di ber têkoşînê de daye. Em ê vê têkoşînê ji xwe re bikin esas û li mîrateya bi dehan salan a hevala xwe Roşnayê bibin xwedî.’’