Ebdulezîz Şêxo, 1’ê Kanûnê li Hesekê şehîd ket û bi merasîmekê li Navenda Civaka Kurd a Demokratîk a Kolnê hat bibîranîn. Malbata wî, malbatên şehîdan û gelek kes beşdarî merasîmê bûn. Wêneyên Ebdulezîz Şêxo, Rêber Apo û alayên PKK’ê li salonê hatin vekirin.

Bibîranîn ji bo bîranîna Şehîdên Azadiya Kurdistanê bi deqîqeyek rêzgirtinê dest pê kir û piştre endama KOMAW’ê Şenge Kahraman, birayê Şehîd Ebdulezîz Firaz Şêxo û endama PYD’ê Zozan Derikê axaftin kirin. Zozan Derik diyar kir ku bi şehadeta Ebdulezîz şehîdên malbatê bûn du kes û wiha axivî “Li Rojavayê gelek malbatên me du, sê an jî zêdetir şehîd dan. Êrîşên dagirkeriyê yên dewleta Tirk gelê me dike hedef. Armanca wan jiholêrakirina îradeya gelê Kurd û komkujî ye. Lê belê bi saya bi hezaran şehîdên me û 25-26 hezar gaziyên me, dê têkoşîna gelê me bidome. Êrîşên dijmin çiqas zêde bibin, dê berxwedana me jî ewqas mezin bibe û bidome. Dê nefreta di dilê me da jî ewqas zêde bibe.”

Piştre li ser wesîyeta Şehîd Ebdulezîz malbatê stran gotin.