Pariya Yekitiya Demokrat (PYD) li dijî êrîşên dewleta Tirk a dagirker, li Qamişloyê meşeke girseyî lidar xist.

Tevî endam û rêveberên Tevgera Civaka Demokratîk (TEV-DEM), sazî û dezgehên Rêveberiya Xweseriya Demokratîk, kesayetên navdar û bi sedan şêniyên Qamişloyê tevlî meşê bûn.

Meşê ji Çerxerêya Sonî ya bajêr dest pê kir û wêneyên zarokên di êrîşan de şehîd û birîndar bûne, wêneyên Rêber Apo û yên şehîdên şoreşê hatin hildan û pankartên “Bi sekna şerê gel ê şoreşgerî em ê dagirkeriyê têk bibin” hatin vekirin. Gelek caran jî dirûşmên “Na ji êrîşên dewleta Tirk a dagirker re”, “Kujer Erdogan”, “Bijî Berxwedana Rojava”, “Bijî berxwedana Îmraliyê”, “Bijî Serok Apo”, û “Jin Jiyan Azadî” hatin berzkirin.

Girseya meşê li Çerxerêya Sebeh Behrat sekinî. Li wir piştî rêzgirtinê, hevserokê Meclisa Gelan a Rêveberiya Xweseriya Demokratîk Hikmet Hebîb axivî.

Hikmet Hebîb bal kişand ser têkoşîn û berxwedana şehîdan û diyar kir ku bi saya berxwedana wan gihîştine ber deriyê azadiyê.

Hikmet Hebîb diyar kir ku êrîşên dewleta Tirk a dagirker jî û destnîşan kir ku ji roja ewil ya  avakirina Rêveberiya Xweseriya Demokratîk heya roja îro êrîşên xwe didomîne û got: “Ji bo li Bakur û Rojhilatê Sûryeyê û Rojavayê Kurdistanê modela Rêveberiya Xweseriya Demokratîk bi ser nekeve, dewleta Tirk a dagirker hemû çeteyên terorî di nava xwe de hewand û bi destê wan bi her awayî êrîş dibe ser giştî herêmê.”

Hikmet Hebîb di dewama axaftina xwe de da zanîn dewleta Tirk bi taybetî şoreşgerên ku di têkbirina çeteyên DAÎŞ’ê de rol leyîstine dike armanc, dîsa êrîşî binesaziya herêmê dike û jin, zarok û mirovên sivîl qetil dike.

Hikmet Hebîb di dawiya axaftina xwe de diyar kir ku wê gelê herêmê li hember êrîşan heya dawî li ber xwe bide û desnîşan kir ku dewleta Tirk a dagirker çiqasî bi êrîşan bajarê wan xirab bike jî, ew ê dîsa ava bikin.

Hevseroka TEV-DEMˈê Remziye Mihemed jî û di destpêka axaftina xwe berxwedana gelê ku li ber xwe dide, silav ji Rêber Apo re şand.

Remziye Mihemed şehîdên şoreşê bi bîr anîn û  got: “Di şexsê şehîdên Siwêdîkê de hemû şehîdên şoreşê bi bîr tînin û em bejna xwe li hember wan di tewînin. Xeta şehîdan xeta azadî û serkeftinê ye.”

Remziye Mihemed di berdewamiya axaftina xwe de behsa durûtiya siyaset û polîtîkayên dewleta Tirk kir û diyar kir ku ji aliyekî ve hevdîtinê dixin rojevê, ji aliyekî din ve êrîşên xwe bi dijwarî didomînin.

Remziye Mihemed bal kişand ser êrîşên dawî yên dewleta Tirk a dagirker û da zanîn ku hemû jiyan û binesaziya herêmê wêran kiriye.

Hevseroka TEV-DEMˈê Remziye Mihemed di dawiya axaftina xwe de bal kişand ser sîstema êşkence û qirkirinê ya girava Îmraliyê û diyar kir ku çawa berxwedana gel hişt ku ji Îmraliyê silavên Rêber Apo ji gel re werin, wê ji îro şûn de jî bi mezinkirina berxwedana gel, bi temamî deriyê Îmraliyê bê şikenandin.