Şervanê Hêzên Sûriyeya Demokratîk (QSD) Mazlûm Qamişlo (Macid El Hemûd) ku li Dêrazorê di encama êrişên çeteyên girêdayî hikumeta Şamê de birîndar bibû, 17`ê Mijdarê gihaşt asta şehadetê. Şehîd Mazlûm li Pakrewangeha Şehîd Delîl Sarûxan a li bajarê Qamişlo hat oxirkirin.

Şêniyên Qamişloyê, hevalên şehîd, endamên Kongra Star, nûnerên ji Rêveberiya Xweser û saziyên civaka sivîl beşdarî merasîmê bûn.

Merasîmê piştî rêzgirtinê dest pê kir û axaftin hatin kirin.

Endama Meclisa Malbatên Şehîdan a Qamişlo Fatma El Casim diyar kir ku şehîd pêşengên civaka xwe ne û di oxira rizgarkirina gelan de canê xwe feda dikin û wiha pê de çû: “Li Bakur û Rojhilatê Sûriyeyê hemû pêkhate li ber xwe didin, em ji şer û rijandina xwînê hez nakin, lê em erka me ye ku em axa xwe ji êrişên dagirkeran biparêzin.”

Ji fermandarên Meclisa Leşkerî ya Qamişlo Şêx Tirbespiyê jî axaftinek kir û da zanîn ku oxirkirina her şehîdekî ji bo gel êşek e, lê li kelekê wê hilbijartina jiyaneke bi rûmet heye û wiha dom kir: “Dijmin bi şerê taybet û leşkerî hewl dide hevkarî û biratiya navbera pêkhateyan têk bibe. Bila bizanibe ku ev plana wan bi ser nakeve. Em soz didin heta dawiyê em ê li pey şopa şehîdên xwe bin.”

Piştî ku wesîqeya şehîd hat xwendin û radestî malbata wî hat kirin, sayika Şehîd Mazlûm Qamişlo Heniya Ebûd ev axaftin kir: “Ez bi şehadeta kurê xwe serbilind im, ti cudahî di nava me de Ereb, Kurd û Suryayan de tune ye. Em hemû ji vî welatî re ne.” Heniya bi tilîlî û slogana 'Şehîd Namirin' axaftina xwe bi dawî kir.

Bavê Şehîd Mazlûm, Ebas El Hemûd jî axiftinek kir û diyar kir ku ew bi şehadeta kurê xwe serbilind in.

Cenazeyê şehîd Mazlûm Qamişlo li ser milan hat rakirin û bi slogana `Şehîd Namirin` li pakrewangeha Şehîd Delîl Sarûxan hat veşartin.