Cenazeyê endama Hêzên Ewlekariyê Şefîqe Esed yê 14’ê Mijdarê de li Şehbayê dema li ser erka xwe bû û şehîd bû, bi merasîmekî girseyî li Goristana Şehîdên Berxwedana Serdemê hat veşartin.

Bi hezaran koçberên Efrîn û şêniyên Şehbayê cenazeyê şehîd Şefîqe Esed ji Nexweşxaneya Avrîn a li navçeya Fafînê wergirt û ber bi Goristana Şehîdên Berxwedana Serdemê ve bi rê ketin.

Li goristanê merasîm hate lidarxistin. Ji rêveberiya Meclîsa Malbatên Şehîdan a Kantona Efrîn û Şehbayê Mihemed Wilo sersaxî da malbata şehîd û tevahî şêniyên kantonê û got: "Rêya me bi saya van şehîdan ronî dibe. Em ê jî şopdarên wan bin.”

Sozdar Şêxo jî sersaxî da gelê Bakur û Rojhilatê Sûriyeyê û wiha got: “Berxwedana gelê Efrîn û Şehbayê cihê herî pîroz e ji bo me û em ê tu carî dest ji berxwedana xwe bernedin, berxwedana me hebûna me li vir dide îfadekirin û dê Efrîn jî bê rizgarkirin.”

Piştre wesîqeya şehadetê ya şehîd Şefîqe Esed hate xwendin û radestî malbata wê hate kirin. Cenazeyê şehîd tevî tilîliyên dayikan hat veşartin.