Partiya Sosyal Demokrat a Elman (SPD) xwest, lêkolîn li ser têkiliyên serkomîsera Elman a bi eslê xwe Tirk bê kirin, ku dema li Midûriyeta Emniyetê ya Eyaleta Hessenê wezîfedar bû, derket holê bi MÎT'ê re xebitiye.
SPD'ê xwest, têkildarî polîsa sîxur daxuyaniyeke berfireh bê dayin. Li ser navê Koma SPD'ê parlamentera eyaletê Nancy Faeser daxuyaniyeke nivîskî weşand û bang li Wezîrê Karên Hundir ê eyaletê Peter Beûth ê ji CDU kir.
Parlamentera SPD'ê Faeser bêdengiya Wezîrê Karên Hundir a li ser vê rewşa sosret rexne kir û got, "Îdîayên di nava raya giştî de belav bûne, ji bêdengiya wezîr gelekî giran û girîngtir in. Divê bê lêkolînkirin, bê kesa navborî bi kê re rabûye û rûniştiye."
Di daxuyaniya SPD'ê de ku li meclîsa eyaletê ya Hessenê partiya mûxalefetê ya bingehîn e, ev bang li rêveberiya eyaletê hate kirin: "Divê Wezareta Karên Hundir zanibe, nabe ku karmendên li daîreyên dewleta Elman wezîfedar in bi îstîxbarata Tirk re bixebite."
Di nûçeya duh a ANF'ê de hatibû ragihandin, ku serkomîsera Elman a bi eslê xwe Tirk Dondu Yazgan e.
Nûçeya ANF'ê ya li ser mijarê ev e:
https://anfkurdi.com/rojane/endama-mIt-e-ya-kete-nava-emniyeta-elman-ev-e-83920
