Hevberdevkê Kongreya Demokratîk a Gelan (HDK) Cengîz Çîçek û parlamenterên Stenbolê Kezban Konûkçû û Celal Firat bi armanca protestokirina tayînkirina qeyûm a li Şaredariya Colemêrgê pankarta “bicehnime qeyûm” bi Pira Bogazîçiyê ve daliqandin. 

ÇÎÇEK: DÊ DARBEKAR WINDA BIKIN 
 
Parlamenteran piştî daliqandina pankartê li ser pirê axaftinek kirin. Hevberdevkê HDK’ê Çîçek ewilî axivî û wiha got: “Ji Geziyê heta Kobanê ji Stenbolê heta Colêmêrgê wê darbekar winda bikin. Yên ku serbikevin jî dê bibin gelên Kurdistan û Tirkiyeyê. Em ê serbikevin.”

KONÛKÇÛ: DIVÊ EM LI DIJÎ FERASETA QEYÛM BI HEV RE LI BER XWE BIDIN

Parlamentera DEM Partiyê Kezban Konûkçû jî piştre axivî  û diyar kir ku ew destûrê nadin ku vîna gelê kurd were xespkirin û ev bang li raya giştî kir: “Ji ber ku xespkirina vîna gelê kurd, xespkirina vîna hemû gelan e. Ji bo ku vê pergala talan û derewan bidomînin her tim vîna gelê kurd xesp dikin. Em vê qebûl nakin. Em ji vir bang li hemû girseyên demokratîk dikin; divê em li dijî feraseta qeyûm bi hev re li ber xwe bidin. Em neçar in ku bên li ba hev.” 
 
FIRAT: SERKETIN A ME YE   

Parlamenterê DEM Partiyê Celal Firat jî wiha got: “Hem hûn ê bibêjin ‘serwerî bê şert û merc a gel e’ hem jî qeyûm tayînî vîna gel bikin. Heke serwerî bê şert û merc a gel be wê demê divê teqez rêzê ji vîna gel re bigirin. Serkeftin ya me ye.”

Parlamenteran piştre li gel çepik û tilîliyan dirûşmeya “Bijî berxwedana Colemêrgê” berz kirin.