Meclîsa Gel a Daglioglû ya Edeneyê, li Xaçerêya Karasû daxuyaniyek da çapemeniyê û xwerêveberî îlan kir. Di daxuyaniyê de ji 7 heta 70 salî bi sedan kes amade bûn. Ciwanên rûyê xwe pêçandin jî parastina gel kirin û li dijî êrîşeke gengaz a polîsan ketin rewşa xweparastinê.

Di daxuyaniyê de hat gotin, "Weke gelên ji baweriyên cuda, em dewletê red nakin, lê belê dibêjin, ku em ê bi van saziyên dewletê re nikaribin xwe bi rêve bibin û rewabûna van saziyên dewletê êdî ji bo me nemaye. Bi vî rengî ti rayedarekî dewletê yê hatiye wezîfedarkirin, wê nikaribe me bi rêve bibe. Ji niha û pê ve em ê xwerêveberiyê esas bigirin û jiyana xwe li ser bingeha demokrasiyê ava bikin. Li dijî her şêwe êrîşan em ê xwe biparêzin."

Gel, li ber çepik û tilîliyan bi qîrîna dirûşmeya "Bijî Serok Apo" xwerêveberî îlan kir.

Li dû daxuyaniyê girseya gel a xwest ber bi Navenda Polîsana  Ş. Mehmet Alî Arslan a li kolana Bahçelîevlerê bimeşe, rastî êrîşa polîsan a bi bombeyên gazê, ava şid, fîşekên plastîk û fîşekên rastî, hat. Li hemberî êrîşa polîsan gel li ber xwe da. Piştî demeke dirêj a pevçûnan welatî li nava kolanan belav bûn. Polîsên Tirk jî bi maşînên zirxî ketin nava kolanan û zêdeyî 10 kes ku di nav de zarok jî hene, bi lêdanê kirin binçavan.

Tevî ku pevçûn bi dawî bû jî, dorpêçiya polîsan a li taxê bi saetan dewam kir.