DEM Partî di daxuyaniya xwe ya nivîskî de got, "Li Tirkiyeyê pîrozbahiya Newrozê ya 21’ê Adarê bi rengekî aştiyane û bi coş derbas bû. Li gelek bajarên Ewropayê jî bi heman awayî hatin pîrozkirin. Lê komên nîjadperest û paramîlîter ên ku ji aliyê îtîfaqa AKP-MHP’ê ve tên xwedîkirin û perwerdekirin vê rastiyê nekarîn bipejirînin û li dijî endamên malbatên Kurd ên ji pîrozbahiya Newrozê vedigeriyan Brukselê êrîşeke nîjadperestî pêk anîn. Rayedarên AKP’ê jî li şûna van êrîşan şermezar bikin û banga aramiyê bikin, rola berdevkê komên paramîlîter girtin ser xwe û rê li ber hêrsdariyê vekirin.
Di vê pêvajoyê de ku demeke pir kurt ji hilbijartinan re maye, em diyar dikin ku her daxuyaniya ku êrîşên nîjadperestiyê vediguherînin amûrê hilbijartinê û Kurdên li Ewropayê dijîn dike hedef, xizmetê ji faşîzm û bêçareseriyê re dike. Em bang li desthilatdariyê û rayedarên wê dikin ku tavilê dest ji vê helwesta xwe berdin. Her wiha em bang li hemû gelên xwe yên li Ewropayê dijîn dikin ku neyên provokasyonan û bi aqlê selîm tevbigerin. Divê rayedarên Belçîkayê li dijî koma nîjadperest karûbarên hiqûqî bide destpêkirin, da ku pêşî li rageşiyên mezintir bên girtin.”