Bi sedan welatiyên navçeya Şedadê ya Kantona Hesekê cenazeyê endamê Hêzên Erka Xweparastinê Daûd Xelef ku li bajarê Dêra Zorê di Pêngava Bagera Cizîrê de şehîd bûbû, ji Meclîsa Malbatên Şehîdan a Hesekê rakirin û bi karwanekî ji wesayîtan birin goristana şehîdan a navçeya Şedadê.

Li goristanê ji bo bîranîna şehîdên têkoşîna azadiyê deqeyek rêz hate girtin û şervanan merasîmeke leşkerî pêk anîn. Ji fermandarên Hêzên Erka Xweparastinê Salim Îbrahîm li merasîmê axivî û sersaxî ji malbata şehîd re xwest. Îbrahîm got, şehîd ji bo azadiya gelên herêmê canê xwe feda dikin.

Nacî Nicûm jî li ser navê Meclîsa Malbatên Şehîdan a Şedadê sersaxî ji malbata şehîd re xwest. Piştre wesîqeya şehadetê ji aliyê endama Meclîsa Malbatên Şehîdan Ayat Îbrahîm ve hate xwendin û radestî malbtê hate kirin.

Welatiyan cenazeyê endamê Hêzên Erka Xweparastinê li ber dirûşm û tilîliyan spartin axê.