Aktîvîstên li Elmanyayê, ku ji bo bidawîbûna tecrîdkirina Rêberê Gelê Kurd Abdullah Ocalan di demên cuda de dest bi greva birçîbûnê kirin, hefteya debasbûyî li Berlînê li hev civiyan û biryar dan ku çalakiya xwe bi hev re bidomînin.

Omer Bagdûr û Cemal Kobanê yên ji Kasselê, Mele Mûstafa Tûzak ê ji Duisburgê û Şiyar Xelîl ê ji Nurnbergê, li meydana navbera avahiyên Meclîsa Federal û Serokwezaretiyê li hundirê karavanekê çalakiya xwe didomînin.

Kurdên li Berlînê jî tevî dostên xwe serdana çalakgeran dikin. Herî dawî doh parlamenterên berê û şaredarên HDP'î yên sirgûnkirî, akademîsyen, hunermend û rojnamevanan serdana berxwedêrên greva birçîbûnê kirin.

Parlamenterê berê yê Wanê Kemal Aktaş di dema serdanê de axivî û ji bo çalakiyên greva birçîbûnê banga hişyarî û berpirsyariyê kir. Aktaş diyar kir, ji bo bidawîbûna tecrîda li Îmraliyê roleke girîng dikeve ser milê Hikumeta Elman a Federal.

Aktaş da xuyakirin, greva birçîbûnê wê teqez bi ser bikeve û got, "Ji ber ku berxwedan mirovan bi ser dixîne. Ev mirov jî bi mehan e bi rengekî mezin li ber xwe didin. Me jî ji bo piştgiriya çalakiya van hevalan dest bi çalakiya nobedê kirin û çalakiya me wê heta roja Înê bidome."

Bi navê berxwedêran Mele Mûstafa Tûzak jî anî ziman ku tecrîd sûcekî giran e yê li dijî mirovahiyê û bang kir: "Nedibû ku me tecrîdkirina serokê xwe qebûl bikira. Em hêza xwe ji Mazlûm Dogan, M. Hayrî Dûrmûş û hevalên xwe yên din ên li girtîgehan li ber xwe didin werdigirin. Em bang li her kesî dikin ku li dijî tecrîdkirina serokê me bikevin nava liv û tevgerê."

Çalakiya nobedê ku wê heta roja Înê bidome, her roj saet di navbera 13:00-17:00 de li meydana Brandenburg Tor pêk tê.