Artêşa Rûs da xuyakirin, ku komek ji 100 kesî di ser Tirkiyeyê re derbasî Sûriyeyê bûye û êrîşî Girê Spî (Til Ebyadê) kiriye. Artêşa Rûs, der barê vê êrîşê de ji Tirkiyeyê xwest, daxuyaniyekê bide.

General Sergey Kûralenko yê ji navenda şopandina agirbesta li Sûriyeyê berpirsyar e daxuyaniyeke nivîskî weşand û diyar kir, piştî bicihhatina agirbesta li Sûriyeyê, di nava 24 saetan de agirbest 9 caran hatiye binpêkirin.

RÛSYAYÊ TÊKILDARÎ BINPÊKIRINA AGIRBESTÊ JI ALIYÊ TIRKIYEYÊ VE, JI DYA DAXUYANÎ XWEST

Kûralenko da zanîn, agirbest ji aliyê giştî ve di meriyetê de ye û da zanîn ku di ser Tirkiyeyê re komek ji 100 kesan derbasî Sûriyeyê bûye û êrîşî Girê Spî kiriye.

Navenda ji kontrolkirina agirbestê berpirsyar ragihand, ku ev êrîş ji aliyê Tirkiyeyê ve hatiye destekkirin û diyar kir, li herêma Lazkiye jî êrîş li dijî gundekî hatiye kirin.

Kûralenko da xuyakirin, ku artêşa Rûs der barê van binpêkirinan de agahî daye Dewletên Yekbûyî yên Amerîka (DYA) û xwestiye, têkildarî êrîşê daxuyanî were dayîn. Generalê Rûs bibîr xist ku Tirkiyke di nava koalîsyona li dijî DAIŞ'ê ya bi pêşengiya DYA de cih digire.

Yekîneyên Parastina Gel (YPG) û Partiya Yekîtiya Demokratîk (PYD) jî dabûn xuyakirin, ku komek ji Tirkiyeyê hatiye û êrîşî Girê Spî kiriye. Ev çeteyên pişta xwe dispêrin Tirkiyeyê ji heman malbatê 17 sivîl qetil kiribûn. Di şerê dijwar ê li gelek nuqteyan de êrîşa çeteyan hat şikandin û li gorî YPG'ê zêdeyî 100 çete hatibûn kuştin.