Li paytexta Fransa Parîsê, bi mêvandariya endamê Komîsyona Têkiliyên Derve ya Parlamentê Françoîs Asensî, konferanseke Kurd bê lidarxistin. Di konferansê de wê Hevserokê BDP'ê Selahattîn Demîrtaş û Hevserokê PYD'ê Salih Muslim jî amade bin.

Koordînasyona Piştevaniya Neteweyî ya bi Kurdistanê re (CNSK) ku ji organîzasyonên Fransî û Kurd pêk tê li Parîsê bi sernavê "Welat û Kurdistan, pêşerojeke çawa?" konferansekê lidar dixe. Konferans dê di 13'ê Mijdarê de pêk were û endamê Komîsyona Têkiliyên Derve ya Parlamentê Françoîs Asensî jê re mêvandariyê bike.

Li gorî daxuyaniya CNSK, konferans wê bi du civînên li dora maseya gilover were lidarxistin. Beşa yekemîn a konferansê wê di navbera saet 15:30-17:15'an de pêk were.

Axaftina vekirinê dê ji aliyê Françoîs Asensî û endamê Meclîsa Şaredariya Marsîlyayê Joel Dûtto ve were kirin. Civîna yekemîn wê bi sernavê "Li Rojhilata Navîn a dikele rewşa Kurdan" pêk were. Moderatoriya wê dê ji aliyê endamê Buroya Neteweyî ya Tevgera Aştiyê Yves-Jean Gallas ve bê kirin û weke axaftvan jî rojnamevan Laûre Marchand, profesorê Zanîngeha Galatasarayê Ahmet Însel, Hevserokê PYD'ê Salih Muslim û Hevserokê BDP'ê Selahattîn Demîrtaş cih birin.

Mijara civîna duyemîn a navbera saet 17:30-19:00 jî dê "Polîtîkaya Fransayê ya der barê pirsgirêka Kurd de" be. Di vê beşa bi moderatoriya profesorê zanîngehê Pascal Torre de dê parêzer Sylvîe Boîtel, Seroka CNSK'ê Sylvîe Jan û Serokê Federasyona Komeleyên Kurd li Fransayê (FEYKA) Mehmet Ulker weke axaftvan cih bigirin.

Danezana encamê dê ji aliyê Komeleya Dostaniya Kurdan a Broton'ê Andre Metayer ve were xwendin.

CNSK ya konferansê birêxistin dike ji van organîzasyonan pêk tê: Amis du Peuple Kurde en Alsace - Amitiés Corse Kurdistan - Amitiés Kurdes de Bretagne (AKB) - Association Iséroise des Amis des Kurdes (AIAK) - Association Solidarité France Kurdistan - Fédération des Associations Kurdes en France (FEYKA) - Hauts-de-Seine Kurdistan -Mouvement de la Paix - MRAP (Mouvement contre le Racisme et pour l’Amitié entre les Peuples) -Parti Communiste Français (PCF) - Solidarité et Liberté (Marseille) - Union Démocratique Bretonne (UDB) -Nouveau Parti Anticapitaliste (NPA) - Mouvement Jeunes Communistes de France (MJCF).