Li Moskovayê ya ku paytexta Rûsyayê ye Kurd hatin ba hev û diyar kirin ku ev çend roj in ku li hemberî şewata li Îmraliyê bi fikar in û diyar kirin ku divê parêzer biçin hevdîtina Rêber Apo.

Hevseroka Meclîsa Kurdan a Moskovayê Rafike Kemail û Seroka Organîzasyona Jinên Kurd ên li Moskovayê Tera Qadir axivîn. Axaftvanan diyar kirin ku ew nikarin agahiyan ji Rêberê Gelê Kurd Abdullah Ocalan werbigirin û ji bo rewşa wî zelal bibe divê hevdîtina wî ya bi malbat û parêzerên wî re pêk were.

MÎÇÛRÎNSK

Li bajarê Mîçûrînsk ê Tambova Rûsyayê jî Kurd li hev civiyan û ji bo rewşa Rêberê Gelê Kurd Abdullah Ocalan daxuyanî dan. Çalakgeran diyar kirin ku Rêber Apo û hevalên bi wî re, di bin talûkeyê de ne û CPT di serî de hêzên navneteweyî ji vê rewşê berpirsyar in.

KRASNOKÛT

Li navçeya Krasnokût a herêma Saratovê jî ji ber şewata li Îmraliyê daxuyanî dan. Hevserokê Otonomiya Kurdan a Krasnokûtê Ramazan Bûdakov di daxuyaniyê de axivî û got ku “Rêber Apo 21 sal in dîl e û êşkence lê tê kirin. A niha jî tê diyarkirin ku agir bi Îmraliyê ketiye. Em diyar dikin ku heta Rêber Apo azad bibe wê têkoşîna me bidome û em ê xwedî li Rêber Apo derkevin.”

YERŞOV

Kurdên li navçeya Yerşovê jî derbarê şewata li Îmraliyê nerazîbûna xwe nîşandan. Serokê Otonomiyê MîrzaalîYûsûbov di daxuyaniyê de axivî û diyar kir ku ji ber şewata li Îmraliyê gelê Kurd ketiye nav fikaran û divê li hemberî vê şewatê tu kes bêdeng nemîne. Yûsûbov bang li CPT û saziyên navneteweyî kir ku bila bi lez mudaxeleyî vê rewşê bikin û helwesta xwe zelal bikin.