Endamê Desteya Rêveber a KCK’ê Duran Kalkan bal kişand ser dîwarê şermê û got: “Têkoşîna gerîla û gelê Kurd ji niha ve dê dîwaran hilweşîne. Divê bê zanîn ku bi guleyekê dîwar dikare were hilweşandin.”

Endamê Desteya Rêveber a KCK’ê Duran Kalkan têkildarî pêvajoya Çareseriya Rizgariya Demokratîk a ku Rêberê Gelê Kurd Abdullah Ocalan di Newroza 2013’an de bi fermî da destpêkirin de ji rojnameya Azadiya Welat re axivî. Kalkan deştnîşan kir ku hikûmeta AKP’ê hem li hemberî demokratîkbûnê û hem jî li hemberî çareserkirina pirsgirêka Kurd e û wiha got: “Ger AKP vê pêvajoyê bi dawî bike dê di binê berpirsyariya wê de bimîne. Dê xwe nikaribe li hemberî berxwedana gelê kurd û têkoşîna PKK’ê bigire. Dixwaze bi xapandinê vê rewşê bimeşîne. Aliyek ku ji vê tiştê neyê fêmkirin tune ye. Dema Rêber Apo li hemberî vê yekê helwesta xwe da nîşandan û raya giştî hişyar kir, vê carê AKP’ê xwest ku bi rêya şantaj, gef û tundiyê siyaseta demokratîk bi bandor bike. Em van tiştan hemû fêm dikin.” 
 
‘AKP NÎJADPEREST E’

Kalkan bi bîr xist ku divê her kes baş bizanibe ku di AKP’ê de ne niyeteke ji bo çareseriyê, ne zîhniyeteke demokratîk û ne jî naskirina hebûna gelê kurd heye û wiha pêde çû: “AKP jî wekî CHP’ê faşîst û nîjadperest e. AKP li cihê Ergenekona Spî ya tirkîtiyê, Ergenekona Kesk a tirkîtiyê xist dewrê. Wekî hêzeke sentez a tirk-îslam. Niyet û polîtîkaya AKP’ê wiha ye. Nikarin di eniyan de têbikoşin, bi xapandin û mijûlkirinê dixwazin rewşê xilas bikin. Tişta ku tê kirin niha ev e. Rastiya dewlet û hikûmetê ev e.” 

Kalkan der barê agirbestê de jî axivî û wiha dirêjî da axaftina xwe: “Çêkirina qerekol û bendavan didomin, hêj dest nedane pergala cerdevaniyê, sewqiyata leşkerî hêj didome lê hêj agirbest berdewam dike. Dê ev rewş çiqas berdewam bike? Di rastiya xwe de gotina agirbestê niha gelek zehmet e. Niha rewşeke ku ji paşerojê hatiye, wateya xwe winda kiriye û çawa ji holê bê rakirin ne diyar li holê heye. Nirxandineke bi vî rengî ya li ser agirbestê ne xelet e. Mirov dikare vê tiştê bi awayeke rast wiha jî pênase bike; li holê agirbesteke fermî tune ye lewma her du alî şer naxwazin an jî şer nakin. Dibe ku rewşeke bi pevçûn jî têkeve rojevê. Dibe ku bersivdayîn jî çêbibin. AKP jixwe amadekariya şer dike. Ev rewş dê çiqas berdewam bike ne diyar e. Jixwe rewşeke fermî jî li holê tune ye, rewşeke fîîlî li holê ye. Jixwe Tayyîp Erdogan bi awayeke aşkera got ku rewşeke fermî tune ye. Rêber Apo jî gotibû ku bila werin ew wê rewşê veguherînin fermiyetê. Lê belê hikûmet û dewlet nêzî vê yekê nebûn. Fermiyetiyetek nadin avakirin. Ji ber wê jî niha rewş ne fermî ye, fîîlî ye. Ger sedem veguherin dê rewşa fîîlî jî veguhere.”  

Duran Kalkan diyar kir ku ger aştiyek di navbera kurd û tirkan de çêbibe wê ev yek jî tenê bi saya Rêberê Gelê Kurd Abdullah Ocalan pêk bê û wiha dirêjî da axiftina xwe: “Yê ku pirsgirêka kurd bi rêya demokratîkbûna siyasî û yekitiya Tirkiyeyê çareser bike tenê Rêber Abdullah Ocalan e. Vala vala gelê kurd negot ‘Qasidê Aştiyê, Qasidê çareseriyê li Îmraliyê’ ye. Ger ku çareseriyek û aştiyek bi vî awayî çênebe wê careke din ne pêkan be ku aştî û çareseriyek bi vî awayî çêbibe. Wê gelê kurd bi hêza xwe û bi destê xwe çareseriyê pêk bîne. Divê ku di destpêkê de yên ji Tirkiyeyê hez dikin, rewşenbîr, jin û ciwan vê yekê bizanibin. Ger bi xwe bawer bin divê yên ku Tirkiyeyê bi rê ve dibin jî vê yekê bizanin. Ne xwe wê hemû tiştî winda bikin.” Kalkan destnîşan kir ku Rêberê Gelê Kurd Abdullah Ocalan ji bo gelê kurd pir girîng û bi nirx e û wiha got: “Di heman demê de Rêber Apo ji bo hemû gelê tirk jî girîng û bi nirx e. Valaderxistina Rêber Apo wê zerarê bide gelê kurd, dê herî zêde jî zerarê bide tirkan û Tirkiyeyê. Lewre valadernexistina Rêber Apo û xwendîderketina lê berpirsiyariya hemû demokrat û welatparêzên Tirkiyeyê ye.”
 
DÊ TU HÊZ  GELÊ BAKUR Û ROJAVA JI HEV NEQETÎNE

Duran Kalkan bal kişand ser Rojava û da zanîn ku dewleta tirk li Rojava deriyên sînor girtine, derbasbûn asteng kirine û dîwarê şermê lêkiriye û di berdewamiya axaftina xwe de wiha got: “Tirkiye bi awayekî rasterast piştgiriyê dide çeteyan. Rêveberiya KCK’ê jî ev yek bi awayekî zelal aşkera kir. Di van hefteyan de bi dehan ciwanên kurd ji ber êrîşên çeteyan ên bi piştgiriya dewleta tirk di şer de jiyana xwe ji dest didin. Heke dewleta tirk şerê li hemberî kurdan îro li Rojava bidomîne û mirov di vê pêvajoyê de bibêje ku ‘cenaze nayên’ ev ji bo kurdan nayê tu wateyê. Ev geşedan ji ber van qehraman û şehîdên şoreşê pêk tên. Em vê rastiyê baş dibînin. Ji bo wê jî gotina; ‘11 meh in cenaze nayên’ bo kurdan ne derbasdar e. Ev yek ji bo Rojava jî tune ye, ji bo Bakur jî tune ye. Bi dehan ciwanên kurd jiyana xwe ji dest dan. Şehîdên Rojava şehîdên hemû gelê kurd in. Tu kes nikare cudabûnê têxe navbera vê yekê.” 
 
DÎWAR NABE ASTENG

Kalkan destnîşan kir ku ji bo Tirkiye deriyê sînor asteng bike tu tişt neman nekir, lê belê tu hewldanên wan li hemberî têkoşîna gelê kurd û gerîlayan nebûn asteng û wiha axaftina xwe bi dawî kir: “Van hewldanên Tirkiyeyê li hemberî yekitî û hevgirtina gelê Rojava û bakurê Kurdistanê nebûn asteng. Ev dîwar jî dê nebin asteng. Têkoşîna gerîla û gelê kurd ji niha ve dê dîwaran hilweşîne, divê ku bê zanîn bi guleyekê dikare dîwar were hilweşandin. Wekî hinek derdoran gotiye, yên ku dîwaran di navbera gel de lêdikin na, yên ku pireyê çêdikin dê bi ser bikevin. Gelê kurd ê Rojava û Bakur yek in, wê bi hev re jî qezenc bikin. Ev pêvajo ji aliyê Rêber Apo ve pêş dikeve, herkes ji ber baweriya bi Rêber Apo têkoşînê didomîne. Dema ku wextê wê hat dê hesabê vê yekê bipirsin û tola wê jî dê were girtin. Divê ku her kes vê yekê baş bizane.”