Ermenîstanê Qirkirina Êzidiyan nas kir
Parlamenta Ermenîstanê, sûcên ku li dijî Êzidiyan hatine kirin weke qirkirinê nas kir.
Parlamenta Ermenîstanê, sûcên ku li dijî Êzidiyan hatine kirin weke qirkirinê nas kir.
Parlamenta Ermenîstanê, pêşnûmeya li ser sûcên ku sala 2014'an ji aliyê DAÎŞ'ê û hin çeteyan ve li dijî Êzidiyan hate kirin weke 'qirkirinê' nas dike, qebûl kir. Di dengdanê de 91 dengên 'erê' û dengekî bê alî hate dayin.
'EM NAS DIKIN Û BI TUNDÎ ŞERMEZAR DIKIN'
Di biryarnameya pêşnûmeyê de wiha hat gotin:
"Ermenîstan dilsoziya xwe ya bi parastina mafên mirovan, pîvan û armancên Peymana Neteweyên Yekbûyî re ji nû ve destnîşan dike, hewldanên civaka navneteweyî yên ji bo pêşîgirtina li sûcên qirkirinê û cezakirina van sûcan, berpirsyariyên dewletan ên ji bo hurmeta li mafên neteweyî û hindikahiyan girîng dibîne, soza Ermenîstanê û gelê Ermenîstanê ya li ser pêşîgirtina li qirkirinan destnîşan dike û qirkirina ku rêxistinên terorê yên li Iraqê sala 2014'an li civaka Êzidî hate kirin nas dike û bi tundî şermezar dike."
'DIVÊ SÛCDAR WERIN CEZAKIRIN'
Alîkarê Serokê Komîsyona Mafên Mirovan a Parlamenta Ermenîstanê Rostem Mahmûdyan ji bo lêkolînkirina sûcê qirkirinê bang li raya giştî ya navneteweyî kir. Mahmûdyan ku bi xwe jî Êzidî ye got, "Ev sûcên tirsnak, salên 1915-1923'an li dijî civaka Ermenî weke sûcê qirkirinê hate kirin û dişibin hev. Pejirandina qanûnê têrê nake, ya girîng ew e ku bang li civaka navneteweyî were kirin ji bo vî sûcî lêkolîn bike û bike ku berpirsyarên vî sûcî werin darizandin."