Ji bo pîrozbahiyên 4'ê Nîsanê ku her sal mîna kevneşopiyekê tên lidarxistin, bi dehan hezar mirov diçin Xelfetiyê û rojbûna Rêberê Gelê Kurd Abdullah Ocalan pîroz dikin. Tê payîn ku îsal jî bi hezaran mirov biçin gundê Amara ku Ocalan lê ji dayik bûye û tevlî pîrozbahiyê bibin. Li gel astengî, zext û zordariyê jî ji her devera Tirkiye, Kurdistan û Ewropayê mirov tevlî pîrozbahiyên 4'ê Nîsanê dibin.

Hevserokê DBP'ê yê navçeya Ceyhanê ya Edeneyê Tahîr Ozdemîr diyar kir, wan amadekariyên xwe temam kirine û wê bi 10 otobusan ji Edeneyê berê xwe bidin Amarayê. Ozdemîr bang li gelê Kurd kir ku li Amarayê tevlî pîrozbahiyê bibe. Ozdemîr bi bîr xist, par ew bi 4 otobusên mezin tevlî pîrozbahiyên Amarayê bûbûn û got, îsal wê hîn bi xurtî tevlî bibin.

Ozdemîr bal kişand ser tecrîdkirina Ocalan û got, "Tecrîd ne tenê li dijî Birêz Ocalan e, gelê kurd, gelên Rojhilata Navîn û zindanî hemû tecrîdkirî ne. Leyla Guven û girtiyên me yên li zindanan bi berpirsyarî rabûn û dest bi greva birçîbûnê kirin. Em jî li derve dema bi xurtî li hev bicivin, em ê karibin destekê bidin greva birçîbûnê. Ji ber vê yekê bang li her kesî dikim ku berê xwe bidin Amarayê."