Ferît Şenyaşar ku 11 roj in ji bo edaletê çalakiya rûniştinê dike, wiha got, "Dîmenên li nexweşxaneyê di destê serdozger de ne. Bila dozger erka xwe bi cih bîne, em jî hingî dawî li çalakiya xwe bînin. Em ê dest ji daxwaza xwe ya edaletê bernedin."
Emîne Şenyaşar ku li navçeya Pirsûsê ya Rihayê hevserê wê Haci Esvet Şenyaşar û zarokên wê Adil û Celal Şenyaşar ji aliyê xizm û parêzvanên wekîlê AKP'ê Îbrahîm Halîl Yildiz ve hatin qetilkirin, tevî kurê xwe Ferît Şenyaşar ê bi birîndarî ji êrişê rizgar bû, li ber Edliyeya Rihayê 11 roj in çalakiya ji bo "edaletê" dike.
Ferît Şenyaşar anî ziman ku ew li ber edliyeyê têkoşîna ji bo edalet û maf dimeşînin û got, "Eger daxwaza edaletê sûc be, ez û dayika min em ê vî sûcî her tim bikin. Em ê dest ji daxwaza xwe ya edaletê bernedin."
Şenyaşar diyar kir ku dîmenên nexweşxaneyê di destê serdozger de ye û got, "Bila karê xwe bike. Bila yên ku komkujî kirine hemûyan bigire. Bila dozger wezîfeya xwe bi cih bîne ku em jî dawî li çalakiya xwe bînin."
