Civîna giştî ya Meclisên Jinan li Kobanê û derdora wê bi mebesta pêşxistina rola jinan di vê pêvajoyê de li Rojavayê Kurdistanê hate lidarxistin. Endama Desteya Bilind a Kurd û Konseya Rêveber a Yekitiya Star Îlham Ehmed axivî û banga xurtkirina têkoşînê li jinan kir.

Civîna ji alî Meclîsa Yekîtiya Star ve hate orgenîzelirin, bi deqeyeke rêzgirtinê dest pê kir. Piştre Endama Konseya Rêvebir a Yekîtiya Star Îlham Ehmed di civînê de axivî. Ehmed di axaftinên xwe de got: ''Civîna me ku di demeke ku Rojavayê Kurdistanê di nava rewşeke zor de ye pêk hat. Ji ber wê divê hemû endamên me rola xwe baş bilîzin, ta ku em bikarin rola jinan baş nîşan bidin û rêxistina xwe ji hemû kesî re bikin nimûne.''

Her wiha Ehmed destnişan kir ku jina kurd a ku rola pêşeng girtiye, û neha jî di avakirina xweseriya demokratîk li Rojavayê Kurdistanê de baş cihê xwe girtiye. Ehmed ji jinên li Rojavayê Kurdistanê xwest ku tu carî ji mafên xwe yêb rewa gavan paşde neavêjin. Ehmed ji hemû jinan xwest ku li himber sîstema koletiyê ku li ser jinan hatiye ferzkirin baş xwe bi rêxistin bikin.

Di dawiya axaftina xwe de Ehmed ji Meclîsa Gel a Rojavayê Kurdistanê û Encumena Niştimanî Kurdî xwest ku baş rola xwe di pêşxistina Desteya Bilin a Kurd de bigirin.