Jinên Kurdistanî yên li Helsîngborgê dijîn, piştî mîtîngê ji bo destekkirina berxwedana xwerêveberiyê civînek pêk anîn. Li Gavle jî li ser jineolojiyê ku weke 'zanistiya jinê û jiyanê' tê pênasekirin, semînerek hat lidarxistin.

DESTEKA JI BO BERXWEDANA XWERÊVEBERIYA LI BAKUR

Jinên Kurdistanî yên beşdarî meşa 8'ê Adarê ya li Helsîngborgê bûn, piştî meşê li Lokala Navenda Civaka Demokratîk a Kurd li ser girîngiya rojê û rewşa berxwedana li Bakurê Kurdistanê civînek lidar xistin.

Hevseroka Navenda Civaka Demokratîk a Kurd a Helsîngborgê Eylem Batak di axaftina xwe ya li vir de girîngiya 8'ê Adarê ji bo jinan nirxand. Batak bal kişand ser girîngiya rêxistinbûyîna leşkerî ya jinan a di nava berxwedana xwerêveberiyê de.

LI GAVLE'YÊ SEMÎNERE 'ZANISTIYA JINÊ Û JIYANÊ'

Li bajarê Gavle jî, Komuna Jinê û Komeleya Jinê ya Navneteweyî bi beşdariya jinên Swêdî, Kurd û Ereb semînerek li ser jineolojiyê lidar xistin.

Semîner li Lokala Navenda Civaka Demokratîk a Kurd pêk hat û Lînda Duzgun weke qiseker beşdar bû. Duzgun tevî sînevîzyonê, afirandina zanistiya jinê û jiyanê-jineolojî bi tevgera neteweyî ya Kurd re vegot.

Duzgun cudahiyên navbera femînîzm û jineolojiyê nirxand û bang li hemû jinan kir ku roja 15'ê Gulana 2016'an beşdarî konferansa jinolojiyê ya li Parîsê bibin.