Li bajarê Almanya Hamburgê ji aliyê Meclîsa Jinên Kurd ve panelek li ser tundiya li ser jinê tê meşandin hate lidarxistin. Parlementera BDPê ya Amedê Nûrsel Aydogan û nivîskar-rojnamevan Esra Çîftçî beşdar bûn.

Parlementer Aydogan di panela li Zanîngeha Hamburgê de axivî û diyar kir ku tundî ne çarenûsa jinê ye û bal kişand ser girîngiya rêxistinbûn û têkoşîna jinan. Aydogan da zanîn ku çanda desthilatî ya 5 hezar salan a zilaman vîna jinan tune hesibandiye û tundiya li hemberî jinan a li Kurdistan û Tirkiyeyê nirxand.

Aydogan ragihand ku tundiya li ser jinê di dema desthilatiya AKPê de ji sedî 1400 zêde bûye û diyar kir ku jinên di nava siyasetê de cih digirin û tevlî çalakiyên polîtîk dibin jî para xwe ji vê yekê werdigirin.

Aydogan bi bîr xist ku li cîhanê bi milyonan jin li rastî tecawizê tên û gelek jin di bin qûrbanên cinayetên tore û namûsê.

Nivîskar û rojnamevan Esra Çîftçî jî di panelê de axivî û bal kişand ser bandorên tundiya li ser jinan tê meşandin.

Çîftçî da zanîn ku şerê li Kurdistanê tê meşandin gelek jinan mexdûr kiriye û da zanîn ku tundiya li ser jinê bi destê dewletê tê rewa kirin. Çîftçî ragihand ku zilamên ku jin kuştinê de di nava civakê de rêzdar dibin û ev yek jî rê li ber kuştinên nû yên jinan vedike.

Çîftçî bal kişand ser zewacên di temenên zarokatiyê de û diyar kir ku jinên ciwan ji bo pereyan tên firotin, piraniya vana jî neçar dimînin ku xwe bikujin.