Li paytexta Fransayê Parîsê, çalakiya edaletê ya ji bo yek ji damezirînera PKK’ê Sakîne Cansiz, Endama KNK’ê ya Parîsê Fîdan Dogan û Endama Tevgera Ciwanan Leyla Şaylemez ên ku di 9’ê Çileya 2013’an de hatibûn qetilkirin, dewam dike. 

Bi daxwaza ronîkirinê û li ser banga Tevgera Jinên Kurd ên Ewropa weke her Çarşemê îro jî, ji bo 3 jinên şoreşger di pêşengtiya Komîteya Malbatên Şehîdên Parîsê de çalakiyaedalet hate xwestin.

Endamên Tevgera Jinê ya Kurd a Ewropayê û Yekîtiya Jinên Sosyalîst li pêşiya lokala Navenda Civaka Demokratîk a Parîsê kom bûn ber bi Buroya Enformasyona Kurdistanê ya li Gara de Nordê ve meşiyan. Di meşê de pankarta bi nivîsa " Kujerê we mir! Yên ku fermandane dijîn û azad in; Fransa tu çi dikî?" hate vekirin û dirûşmên " Em edaletê dixwazin" û "Kujer Erdogan" qîr kirin.

'EM Ê LI PÊŞIYA AVAHIYA DADGEHÊ KOM BIBIN'

Di çalakiyê de endama Tevgera Jina Kurd a Fransayê Zozan Serhat axivî û wiha got: "Edaleta Fransa, piştî mirina sûcdarê Qetlîama Parîsê Omer Guney û şûn de ketiye nava hewldanên dozê dirêj bike û binixûmîne. Piştî mirina Guney dadgeha Fransa diyar kiribûn ku wê doz 23 Çileyê destpê bike, ji niha û şûn de gelo wê rêyek çawa bişopînin. Em ê 23 Çileyê roja Duşemê di saet 13:00'an de li pêşiya avahiya dadgehê kom bibin; daxwaza xwe ya hêzên li pişt vê qetlîamê eşkere bibin dubare bikin.

Çalakiya edaletê bi banga li pêşiya avahiya dadgehê ku wê roja Duşemê di saet 13:00'an de li pêşiya Dadgeha Cîte ya Parîsê kom bibin ve bi dawî bû.