Li paytexta Eremenistanê Erîvanê bi şîara “Newroza Azadiya Rêber Apo” Newroz hat pîrozkirin. Qada Newrozê bi wêneyên Rêberê Gelê Kurd Abdullah Ocalan û şehîdên Newrozê hat xemilandin. Parlamenterê Ermenistanê Kînyas Hesenov, Hevserokê Komîteya Kurdistanê Silo Dirboyan û Endama Yekîtiya Jinên Azad Seyran Celad tevlî pîrozbahiya Newrozê bûn û axaftin kirin. Di pîrozbahiyê de bêyî navber dirûşmeyên “Bê Serok jiyan nabe”, “Bijî Serok Apo”, “Jin, Jiyan, Azadî” û “Şehîd namirin” hatin berzkirin.

Di pîrozbahiyê de ji bo giyanê Şehîdên Azadiya Kurdistanê deqeyek rêz hate girtin. Piştî rêzgirtinê peyama Rêberê Gelê Kurd Abdullah Ocalan û Endamê Komîteya Rêveber a PKK'ê Mûrat Karayilan a Newrozê hat pêşandan.

‘EM Ê TEQEZ BI SER BIKEVIN’

Di pîrozbahiyê de parlamenter Kînyas Hesenov axivî û got: “Newroz cejna gelê Kurd e, Newroz cejna Rêber Apo ye. Newroz cejna serhildan û berxwedanê ye. Ez cejna Rêber Apo û hemû gelê Kurd pîroz dikim.”

Peyama Serokwezîrê Ermenistanê Nîkol Paşinyan a ji bo pîrozbahiya Newrozê hatibû şandin, ji aliyê parlamenter Kînyas Hesenov ve hat xwendin.

Hevserokê Komîteya Kurdistanê Silo Dirboyan jî axivî û wiha got: “Ez Newrozê li Rêber Apo, tevgera me ya jinan û gelê me yê çar parçeyên Kurdistanê pîroz dikim. Bi taybetî Gerîlayên Azadiya Kurdistanê yên ku bi şev û roj li çiyayan li dijî dewleta Tirk a faşîst şer dikin û li berxwe didin silav dikim û Newrozê li wan pîroz dikim. Di vê Newrozê de coş û îradeya me ya têkoşînê bi mizgîniya ku berxwedan û şerê me berfirehtir û xurt dike zêde bûye. Em ê teqez bi ser bikevin.”

‘EM DEYNDARÊN RÊBER APO NE’

Endama Yekîtiya Jinên Azad Seyran Celad jî axivî û got: “Newroz li Rêber Apo û gelê Kurd pîroz be. Newroz berxwedan e, Newroz parastina gel û çanda xwe ye. Em ji vir silavên xwe ji Rêber Apo re dişînin. Em minetdarê Rêber Apo ne. Ji ber ku wî ev felsefe da me û bi vê felsefeyê jinên azad afirand. Em weke jin azadiya îro deyndarê Rêber Apo ne.”

Piştî axaftinan Hozan Axîn, Zagros Rojhilat, Dengbêj Hesen û Dengbêj Yûra derketin li ser dikê û stran gotin.

Pîrozbahiya Newrozê bi gerandina govendê û dirûşmeyan bi dawî bû.