Li bajarê Lûzernê yê Swîsreyê bi meşekê komploya navneteweyî hate protestokirin.

Di meşê de tecrîda li ser Rêberê Gelê Kurd hate protestokirin û meşvanan bal kişandin ser berxwedana li girtîgehan a ku ji bo azadiya Abdullah Ocalan hatiye destpêkirin.

Di heman demê de wê ‘Pirtûkxaneya Rêbertî’ jî di nava 12 rojên li pêşiya me, li gelek bajaran bigere.

Kurdistanî bi pêşengiya CDK-S û YJK-S li Messeplatzê hatin ba hev û li vê derê mîtîngek lidarxistin.

Di mîtîngê de Hevserokê CDK-S’yê Alî Şîmşek axivî û got, “Heta ku tecrîda li ser Rêbertiya me were rakirin, em ê li qadan bin. Divê welatên Ewropayê baş bizanibin ku ew piştgiriyê didin faşîzma Erdogan û dibin hevkarên qirkirina li ser Kurdan. Em li ku bin, em ê têkoşîna xwe bidomînin.”

Dayika Kurd Zelal Ozkan a 71 salî jî tevlî meşê bûbû. Ozkan ji ANF’ê re axivî, “Îro li girtîgehan ji bo tecrîda li ser Rêbertî were rakirin û azadiya wî berxwedanek tê kirin. Dema zarokên Kurd li ber xwe bidin, nabe ku ez li malê bim. Ji bo ku ez bibim berxwedana ji bo gelê Kurd û Rêbertî ez li vir im.”

BÎEL

Li bajarê Bîelê jî êvarî li pêşiya îstasyona trênê mîtîngek hate lidarxistin. Çalakgerên Komuna Jinan a Arîn Mîrxan çalakî li dar xistin û li dijî tecrîd û faşîzma Erdogan slogan berz kirin.