Li gorî rojnameya L'Orîent-Le Joûr li gundekî li başûrê Lubnanê, di bombardûmana Îsraîlê de sê endamên Hîzbûllahê hatin kuştin. Di nûçeyê de hate ragihandin ku şaredar û berdevkekî Hîzbûllahê êrîş û bîlanço piştrast kirine.

Li gorî medya Lubnanê, ji 8'ê Cotmeha 2023'an û vir ve di êrîşên Îsraîlê de li Lubnanê û Sûriyeyê 157 endamên Hîzbûllahê hatin kuştin.

Îsraîlê di 8'ê Çileyê de li başûrê Lubnanê berpirsyarekî payebilind ê Hîzbûllahê kuştibû.

Ev êrîş weke nîşaneyeke girîng a li ser guhertina rêbaza liv û tevgerê ya dewleta Îsraîlê tê nirxandin.

Li aliyê din, artêşa Îsraîlê sibeha Sêşemê diyar kir ku çar leşkerên wan hatine kuştin. Ji destpêka operasyona bejahî ya li ser Xezeyê û vir ve 180 leşkerên Îsraîlê hatin kuştin.

Ji 7'ê Cotmehê û vir ve di êrîşên Îsraîlê de yên li ser Şerîda Xezeyê, li gorî Wezareta Tenduristiyê ya Hamasê zêdeyî 23 hezar kes hatin kuştin.

Li gorî Neteweyên Yekbûyî li Xezeyê di encama bombardûmanan de hemû tax hilweşiyan, ji sedî 85 ê nifûsa herêmê ji cih û warê xwe bû û krîzeke giran a mirovî rû da.