Endamên Yekîtiya Jinên Ciwan a bajarê Hesekê bi boneya 8’ê Adarê Roja Jinên Kedkar a Cîhanê li Kampa Serêkaniyê lîstikek a şanoyê nîşan dan.

Endama Yekîtiya Jinên Ciwan Leyla Hisên diyar kir ku şanoya bi navê "Viyan û Nûjiyan" li ser navê her du endamên Yekitiya Jinên Ciwan ku di 25'ê Kanûna sala borî de tevî 4 endamên Tevgera Ciwanên Şoreşger di êrîşeke dewleta Tirk a dagirker de li Kobanê şehîd bûne û anî ziman ku ev şano diyarî her du şehîdan kirine.

Di çarçoveya çalakiyên Roja Jinan a Cîhanê de Kongra Star a kampa Serêkaniyê ya kantona Hesekê daxuyaniyek da çapemeniyê.

Daxuyanî li pêşiya navenda Hêzên Parastina Civakî ya kampa Serêkaniyê ji aliyê rêvebereke Kongra Star a kampê Cîhan Mihemed ve bi beşdariya dehan jin û mêr û endamên saziyên sivîl û leşkerî, hate xwendin.

Di daxuyaniyê de wiha hate gotin: "Di dîrokê de reftarên rast û çewt ên mirovan hatin nivîsîn, di 8'ê Adarê de jinan di warê siyasî, civakî, aborî û leşkerî de li dijî her cure koletî û mêtingeriyê dîrok nivîsand.

8'ê Adarê rastiya jina azad îfade dike, ji ber ku tu civak bê zext û zordariya li ser jinê û kolekirina ruh û bedena wê bi hemû rêbazên mêtingerî û dagirkeriyê nayên çewisandin, ji ber vê yekê azadiya jin, civak û gel hev du temam dikin."

Di daxuyaniyê de li ser sûcên li dijî jinên Êzidî û êrîşên li ser Rojava hate destnîşankirin ku armanca wan şikandina vîna jinan û sînordarkirina rola wan e. Her wiha hate piştrastkirin ku berxwedana jinên Bakur û Rojhilatê Sûriyê hemû planên dewleta Tirk pûç kirine.                     

Di daxuyaniyê de bang li hemû jinan hat kirin ku li hemberî hemû siyasetên li dijî wan serî hildin û ji bo rakirina tecrîda li ser Rêberê Gelê Kurd Abdullah Ocalan û bidestxistina azadiya fîzîkî dakevin qadan û asta têkoşînê bilind bikin.