DÊRIK

Meclisa Malbatên Şehîdan a Dêrikê bi amadebûna malbatên şehîdan, endamên saziyên sivîl û şêniyên bajarê Dêrikê û herêmên Berav û Koçerat, merasîmeke bîranînê ji bo 91 şehîdên Yekîneyên Parastina Gel (YPG) û Yekîneyên Parastina Jin (YPJ), Hêzên Sûriya Demokratîk (QSD) û gerîla  li dar xist.

Hola merasîmê bi wêneyên Rêberê Gelê Kurd Abdullah Ocalan û wêneyên şehîdan hat xemilandin û 91 mûm hatin pêxistin.

Merasîmê bi rêzgirtinê dest pê kir, piştre endamê Meclisa Malbatên Şehîdan a Dêrikê Mehmûd Ehmed, nasnameyên şehîdan xwend.

Merasîma bîranînê bi stranan bi dawî bû.

ŞEHBA

Meclisa Malbatên Şehîdan a herêma Efrînê, merasîma sersaxiyê li navenda navçeya Ehresê ya kantona Şehbayê danî.

Endamê Meclisê Malbatên Şehîdan a Şehbayê Mihemed Welo di merasîmê de axivî û tevahî şehîdên tevgera azadiyê bi bîr anî. Welo her wiha êriş û kiryarên dewleta Tirk a dagirker şermezar kirin û îşaret bi berxwedan û têkoşîna li hember dagirkeriyê kir.

Li ser navê Meclîsa Ehresê jî Emîne Dingilî wiha axivî: "Dîroka dewleta Tirk a dagirker û qirker bi kuştin, komkujî û êrişan hatiye nivîsandin.”

Piştre endama Kongra Star a Ehresê Necah El-Hisên jî li ser kiryarên dagirkeriyê wiha got: "Dewleta Tirk rojane kiryar û topebaranan li ser gelê me pêk tîne.”

Piştî axaftinan wesîqeya şehîd hate xwendin û radestî malbatê hate kirin.

Di dawiyê de li ser navê malbata şehîd Barîn Botan, bavê şehîd Merwan Beşar axivî û got: "Heval Barîn di şerê Berxwedana Serdemê de tev li nava tevgerê bû, navê xwe li ser navê şehîd Barîn Kobanê lê kir û paşnavê xwe Botan bi ser navê hevalê şehîd Cûma Botan e. Bi şehadeta Barînê em serbilind in û di berdêla azadî û serkeftinê de em ê canê xwe jî feda bikin.”

22’yê Tîrmehê balafireke bêmirov a bi çek a dagirkeriya Tirk li ser rêya Qamişlo li wesayîtekê dabû. Di vê êrişê de Fermandara Hêzên Antî-Teror (YAT) Jiyan Tolhildan, fermandara YPJ’ê Roj Xabûr û endama YAT’ê Barîn Botan şehîd bûbûn.