Bi sedan şêniyên Tebqayê, nûnerên Rêveberiya Sivîl, meclisên leşkerî, partî û rûspiyên eşîran tevlê merasîma veşartina cenazeyê endamê Hêzên Ewlekariya Hundirên Hisên Ewad El-Ferec bûn ku di 4’ê Tebaxê de şehîd bûye.

Li Goristana Şehîdan li ser navê Meclîsa Malbatên Şehîdan Hevserokê Meclîsê Ebdulkerîm Hisên axivî û got: “Şehadet, berztirîn nirxên mirovahiyê û hemû sifatên rûmetê ne.”

Hisên axaftina xwe wiha domand: “Li ser vê axê, rojane em leheng û kesên bêhempa nas dikin ku ji bo welat û axa xwe canê xwe feda dikin.  Ev ax bi xwîna ciwanên vê herêmê hate avdan û hîna bi sedan ciwanên me amade ne li ser şopa wan bimeşin û ji bo rûmet û azadiyê têbikoşin.”

Hevserokê Komîteya Hundirîn a Hêzên Ewlekariya Hundirîn a Tebqayê Riyad El-Walî axivî û îşaret bi girîngiya destanên dîrokî kir ku şehîdan ji bo parastina şêniyan û dabînkirina ewlehiyê nivîsandine kir.

Cîgira Meclîsa Zagonsaz a Rêveberiya Sivîl a Demokratîk a Tebqayê Şadî El-Îbrahîm banga şopandina rêya şehîdan heta tunekriina terorê, zulm û zordariyê kir û got: “Em ê ji bo vê axa pîroz çi bê xwestin bikin.”

Di dawiyê de endamê Meclîsa Malbatên Şehîdan Ebid El-Îsa nasnameya şehîd xwend û radestî malbatê kir.

Di dawiya merasîmê de girseya gel cenazeyê şehîd li Goristana Şehîdan spart axê.