Festîvala Şehîd Berçem ku 13'ê Tebaxa 2022'an li taxa Şêxmeqsûd a Helebê destpê kir û wê 3 rojan dewam bike, bi coşeke mezin dewam dike.

Nêzî 135 jin ji herêmên cuda yên Bakur û Rojhilatê Sûriyeyê; Eyn Dîwar, Reqa, Tebqa, Efrînê, Kobanê û Hesekê beşdar bûn. Jin berhemên xwe bi rêya komên hunerî yên cuda nîşan didin.

Der barê festîvalê ji rêveberiya Tevgera Hîlala Zêrîn a Kobanê Mîrxan Îsmaîl axivî û diyar kir ku ew bi navê koma Şehîd Canda tevlî festîvalê bûne. Mîrxan Îsmaîl ragihand ku armanca wan ew e ku festîval dewlemendtir bibe û çand, hunera gelên Bakur û Rojhilatê Sûriyeyê û hevgirtina wan nîşan bidin.

Mîrxan Îsmaîl bal kişand ser hewldanên dagirkeran ên ji bo têkbirina hevgirtina pêkhateyên herêmê û destnîşan kir ku festîval li dijî van hewldanan peyameke zelal e.

Ji beşdarên festîvalê Rehef Zilfo jî ku bi navê koma Stêra Zêrîn tevlî bûye, diyar kir ku nêzî 3 meh in amadekariya vê festîvalê dikin û wiha dewam kir, "Di festîvalê de gelek pêkhateyan cih girtine, weke Kurd, Ereb, Çerkes û Tirkman. Ji bo mozaîka li Bakur û Rojhilatê Sûriyeyê li tevahiya cîhanê bê dîtin ev festîval hatiye lidarxistin."

Kewser Xelef jî ku yek ji xelkê Reqayê ye û başdarî festîvala Şehîd Berçem bûye diyar kir ku bi vê festîvalê yekîtiya ku di navbera gelê herêmê de weke Kurd û Ereb û hwd. derket holê, ji ber wê ev festîval bersiva herî xurt ji dagirkeriyê re ye ku ew yek in û ew ê bi ser bikevin.

Her wiha Jînda Sozda endama koordînasyona Tevgera Hîlala Zêrîn a Bakur û Rojhilatê Sûriyeyê festîval diyarî Rêberê Gelê Kurd Abdullah Ocalan û şehîdan kir.

Di dawiyê de ciwana bi navê Zêneb Îshaq ji pêkhateya Çerkesî diyar kir ku ew başdarî vê festîvalê bûye ji bo çand û huner xwe ya Çerkesî bi cîhanê bide naskirin.