Bi sedan şêniyên Serêkaniyê cenazeyê şervana YPJ’ê Hêvîdar Beşar (Zîn Şoreşr) ku roja 21’ê Tebaxê dema li ser erka xwe bû şehîd bûbû, ji Nexweşxaneya Roj a bajarê Serêkaniyê  wergirtin û ber bi Goristana Şehîd Rûstem Cûdî ve ketin rê.

Li goristanê ji bo bîranîna şehîdên têkoşîna azaiya Kurdistan deqîqeyek rêz hate girtin û ji aliyê şervanên YPG/YPJ’ê ve merasîmeke leşkerî hate lidarxistin. Piştre li ser navê Meclîsa Malbatên Şehîdan a navçeya Serêkaniya, Zehra Vedo axivî û sersaxî ji malbata şehîd Zîn Şoreş re xwest. Zehra wiha got: "Şehîd Zîn Şoreş jiyana xwe di oxira parastina gel de da û beşdarî hemû pêngavên leşkerî yên li dijî çeteyên DAIŞ`ê bû."

Piştre li ser navê malbata şehîd Zîn meta wê ya endama Hêzên Ewlekariya Hundirîn Sara Beşar axivî û îşaret bi şopandina rêya şehîd Zîn kir.

Piştî bidawîkirina axaftinan nasnameya şehîd ji aliyê Meclisa Malbatên Şehîdan ve hate xwendin û radestî malbatê kirin. Hevrêyên şehîd Zîn cenazeyê wê li Goristana Şehîd Rustem Cûdî ya gundê Berkevirê veşartin.