Bi sedan ji şênî, sazî û dezgehên Rêveberiya Xweser a Herêma Firatê ji bo veşartina cenazeyê Êrîş Berxbotan (Cemal Osman) ê endamê Komandos ku dema li ser peywira xwe şehîd bû û ji bo bîranîna şehîd Arvîn Tolhildan (Perwîn Mihemed) a ku 5’ê Mijdara 2022’an li Zapê şehîd bûbû, kom bûn.

Di merasîmê de ji bo bîranîna hemû şehîdên şoreşê deqîqeyek rêz hat girtin. Piştre li ser navê Meclîsa Malbatên Şehîdan Adil Hacî axivî û wiha got: “Şehîdên azadiyê ji bo jiyanek azad canê xwe feda kirin. Ji bo parastina xaka xwe ji dagirkeriyê, em ê berdêlan bidin û heta em digihijin azadiyê jî em ê berdêlan bidin. Serkeftin para me ye.”

Firyaz Berkel jî anî ziman ku ji bo avakirina civakek polîtîk û exlaqî Şehîd Êrîş û Arvîn canê xwe feda kirin û destnîşan kir ku ew ê teqez bigihijin azadiyê.

Piştre nasnameyên şehîd hatin xwendin û radestî malbatên wan hat kirin. Cenazeyê şehîd bi tilîlî û berzkirina dirûşmeyan hat veşartin.