Dewleta Tirk a dagirker gundên Amûdê, Tirbespiyê û Dirbesiyê yên Rojava bombebaran dike. Li Tirbespiyê jinek, li Dirbesiyê jî endamekî hêzên hikûmeta Şamê birîndar bûn.
Gelek herêmên Bakur û Rojhilatê Sûriyeyê, ji serê sibehê ve ye ku tên bombekirin.
Li gor saeta herêmê, di 16.40’î de gundên Cirnik, Til Hemdûn û Xanîkê yên Amûdê û gundê Qermanê yê Dirbêsiyê hatin bombekirin.
Dewleta Tirk gundên Şelhomiyê, Girdêm û Kêl Hêsnak ê Tirbespiyê di heman wextî de kirin hedef.
Di êrîşa li ser gundê Qeremanê ya rojavayê Dirbesiyê de endamekî hêzên hikûmeta Şamê birîndar bû. Leşkerê birîndar rakirin Nexweşxaneya Şehîd Xebat a navçeyê.
Li aliyê din dewleta Tirk a ku êrîşên xwe ber bi bakur-rojavayê Tirbespiyê berfireh kir, vê carê gundên Til Şeîr û Girkê Zîra bombebaran kir.
Di êrîşa li ser gundê Til Şeîr de jineke ku di zeviya xwe de dixebitî birîndar bû.
