Şervanên YPG-YPJ û QSD’ê ku şerê çeteyên DAIŞ’ê li herêma Dêra Zorê dikin, dibînin ku her diçe DAIŞ xurtir û bihêztir dibe, sedema wê jî ji ber êrîşa dewleta Tirk a dagirker û çeteyên girêdayî wê li ser Efrînê ye û şervan vê yekê wiha dinirxînin ku ew li hember heman feraset û hişmendiya dewleta Tirk a dagirker li Dêra Zorê şer dikin.

Şervanê YPG’ê Harûn Doçka ku di Pêngava Bagera Cizîrê de cihê xwe digre li ser hevkariya çeteyên DAIŞ’ê  û dewleta Tirkiyê wiha anî ziman: ”Em li hember yek dijminî şer dikin, ew jî dewleta Tirk a dagirker e. Îro em dibînin Erdoğan alîkariya DAIŞ’ê dike bi çek , cebilxane û hemû pêwistiyên wan , ji bo vê yekê serkeftina me li Efrînê wê bibe serkeftina herêma Dêrazorê û temamî Sûriyê.”

Şervanê bi navê Cîlo Qamişlo jî dibêje gerek em hemû pêkhate bibin yek li hember artêşa dewleta Tirk a dagirker û çeteyên girêdayî wê; ji ber pilanên wan ku hemû civaka Sûriyê bi Kurd û Erebê wê tune bike

Cîlo Qamişlo li ser berxwedana serdemê jî wiha dibêje: “Em ji berxwedana ku li Efrînê tê meşandin hêz û moral digrin û serkeftina Efrînê wê bibe serkeftina herêma Dêrazorê.”

Şervana YPJ’ê Zeyneb Şedadê ku ji herêma Şedadê ye, tevlî pêngava Bagera Cizîrê bûye û kêfxweşe ku di nava hevalên xwe yên Kurd de,  di heman çeperan de li hember çeteyên DAIŞ’ê şer dikin û dibêje: “Ez weke jineke Ereb cihê xwe di nava YPJ’ê digrim ji bo parastina maf û doza jinê.”

Şedadê di dawiyê de silavên xwe ji hevalên xwe yên ku di Efrînê de berxwe didin rêkir û got: “Em amade ne biçin Efrînê piştgiriya hevalên xwe bikin.”