Ji 12`ê Nîsanê ve xwepêşandanên şêniyên Rojava û Bakur û Rojhilatê  Sûriyê li dijî xiyaneta Partiya Demokrat a Kurdistanê (PDK) û hewldanên tunekirina kurdan û tevgera rizgariyê berdewam dikin. Tê payîn ku xwepêşandan heta 26`ê Nîsanê berdewam bikin.

Di vê çarçoveyê de û li ser bangawaziya Meclisa Malbatên Şehîdan, bi sedan şêniyên navçeya Tirbespiyê ya kantona Qamişloyê, xwepêşandanek li dar xist û hevkariya PDK`ê bi dewleta Tirk re şermezar kir ku êrişeke fireh li dijî Herêmên Parastinê yên Medyayê dest pê kiriye.

Xwepêşandan bi dirûşma “Ji bo parastina rûmeta xwe em li dijî xiyanetê li ber xwe bidin”, ji pêşiya avahiya Kongra Star dest pê kir. Malbatên şehîdan, nûnerên Rêveberiya Xweseriya Demokratîk a Herêma Cizîrê, saziyên civaka sivîl û oldar tev li xwepêşandanê bûn.

Xwepêşandan li rojavayê sûka navendî rawestiye. Di çalakiya li wir de hevserokê Meclisa Malbatên Şehîdan a herêma Cizîrê Hesen Ubêd axivî û got: “Ragihanda şer ji aliyê dewleta Tirk ve li dijî gerîla, piştî 3 rojan ji hevdîtina serokê hikumeta Başûrê Kurdistanê Mesrûr Barzanî û serokê AKP`ê Erdogan, xiyanetên malbata Barzanî yên domdar ên li dijî doza kurdî û gelê Kurd tînin bîra me.”

Hesen Ubêd diyar kir ku êrişa li ser gerîla ne tenê gelê Kurd lê belê gelên herêmê bi giştî dike heedef û wiha pê de çû: “Planeke mêtînger heye ku gelan kole bikin nexasim ku cîhan bi şerê Rûsya û Ukraynayê mijul bûye.”

Di dawiyê de Hesen Ubêd bang li gelê Kurd kir ku li hember van planên qirker bibin yek.

GIRKÊ LEGÊ

Artêşa Tirk a dagirker vê sibê, destpêkirina êrişeke nû li dijî gerîla û gelê Kurd ragihand. Hemwextî wê Partiya Demokrat a Kurdistanê (PDK) hêzeke mezin şand Herêmên Parastinê yên Medyayê, ji bo piştgiriya êrişa li dijî gerîla bike.

Li dijî vê helwesta PDK`ê bi dehan endamên Meclisa Navçeya Girkê Legê, Kongra Star, Meclisa Malbatên Şehîdan û Şaredariya Gel li pêşiya Meclisa Gel a navçeya Girkê Legê ya kantona Qamişloyê kom bûn û daxuyanî da. Di daxuyaniyê de beşdaran êrişên qirker ên dewleta Tirk şermezar kirin û li dijî gelê Kurd û gelên herêmê û destkeftiyên wan bi nav kir.

Cigirê hevserokatiya Meclisa Navçeya Girkê Legê Yusif Remadan daxuyanî xwend. Di daxuyaniyê de êrişa dewleta Tirk a dagirker a bi hevkariya PDK`ê ya li dijî gerîla û Herêmên Parastinê yên Medyayê li Başûrê Kurdistanê hatin şermezarkirin.

Di daxuyaniyê de bang li gelê Kurd û partiyên li Başûrê Kurdistanê hat kirin ku helwestên tund li hember siyasetên PDK`ê nîşan bidin ku xiyanetê li Kurdan dike.

Her wiha di daxuyaniyê de bang li mezinkirina têkoşîn û berxwedanê li hember dagirkerên Kurdistanê hat kirin û wiha hat gotin: “PDK baş dizane ku dewleta Tirk dijminê yekemîn ê doza Kurd û gelê Kurd e. Gelo çawa piştgiriya êrişên wê yên qirker dike û planên kirêt li dijî gelê me datîne?”

Di daxuyaniyê de îşaret bi lihevkirinên dewleta Tirk û PDK`ê hat kirin û hat destnîşankirin ku ew hewl didin vîna gelê azad têk bibin û hemleya dewleta Tirk a dagirker a bi evkariya PDK`ê ya li dijî Herêmên Parastinê yên Medyayê û gerîla, di bingehê de êrişeke li dijî gelê Kurd e ku ji bo azadiya xwe tê dikoşe û li ber xwe dide.