Şêniyên navçeyên Dêrik û Girkê Legê, cenazeyê şervanê QSD'ê Ciwan Bozan ê li ser erka xwe li Girkê Legê şehîd bû, bi meresimekê li Şehîdgeha Şehîd Xebat Dêrik hat veşartin. Şêniyan, cenazeyê şehîd ji ber Nexweşxaneya Şehîd Hogir wergirt û bi karwanekî ber bi şehîdgehê ve bi rê ketin.

Li şehîdgehê bi deqeyekê rêz hate girtin. Ji fermandarên QSD'ê Mihyedîn Xêrkê di meresimê de axivî û wiha got: “Malbata şehîd, kêliyek ji parastina nirxên şoreşgeriyê xwe nedaye alî. Di şoreşê de şehîd dane û tev li pêngavên rizgarkirina gelek herêman bûye."

Bi navê Meclîsa Malbatên Şehîdan a Girkê Legê endama meclîsê Munîfa Silêman, li hemberî gef û êrîşên Tirkiyeyê banga xurtkirina têkoşînê û şopandina xeta şehîdan kir.

Di meresimê de endamê rêveber ê PYD'ê yê Girkê Legê Fûad Sadî jî axivî û got: “Ji ber fedakariyên gelê Bakur û Rojhilatê Sûriyeyê di şoreşê de doza me mezin bûye."

Sadî, bang li gelên Bakur û Rojhilatê Sûriyeyê kir ku li hemberî faşîzma Tirkiyeyê têkoşînê geş bikin.

Apê şehîd, Mihemed Bozan jî diyar kir ku ew bi şehadeta Ciwan serbilind in û soza şopandina rêya şehîdan da.

Piştî axaftinan, nasnameya şehîd ji aliyê endamê Meclîsa Malbatên Şehîdan a Dêrikê Mehmûd Mihemed ve hat xwendin û radestê malbatê hat kirin.

Cenazeyê şehîd bi dirûşmeyên dilsoziya bi şehîdan re hat veşartin.