Hevserokê Giştî yê HDP’ê  Sezaî Temellî bi çarçoweya xebatên hilbijartinê tevlê bernameya vekirina bûroya hilbijartinê ya Esenyûrtê ya Stenbolê bû. Bi hezaran kes tevlî bernameya li taxa Fatîhê bû.

‘EM Ê MIL BIDIN HEV Û JI VÊ DESTHILATDARIYÊ RIZGAR BIBIN’

Temellî bi Kurdî û Tirkî gel slav kir, got AKP’ê tenê şer û zilm kiriye. Temellî wiha domand: ‘’Bêdadiyê didomînin. Heta 24’ê Hezîranê li her devera Tirkiyê, mal bi mal em ê vê bêdadiyê bibêjin. Em ê dawî li astengiyên li pêş aştiyê bînin. Werin em mil bidin hev û ji vê deshilatdariyê rizgar bibin. Em hesabên wan ên 25’ê Hezîranê têk bibin. Em ê 24’ê Hezîranê ne bi 80 lê bi 180 parlamenterî werin Meclîsê. 25’ê Hezîranê her kes wê govenda aştiyê bigerîne.’’

 ‘ÊDÎ TI KURD DENGÊ XWE NADE AKP’Ê’

Temelî got gel şepirze û hejar kirine û domand: ‘’Kanên vî welatî hemû kirin şer. Esnaf ji birçîna dimire. Her roj jin têne kuştin. Karê ciwanan tine. Em ê dawî li vê bêdadiyê bînin. Em partiya Tirkiyê ne. Selahattîn Demîrtaş namzetê Tirkiyê ye. HDP partiya Tirkiyê ye. 24’ê Hezîranê ti Kurd wê dengê xwe nede AKP’ê. Em ê 24’ê mehê AKP’ê di sendoqê de veşêrin. Gelê Efrînê wê vegere ser malê xwe. Wê mifteyên qesrê têxin bin paspasê. Em ê jiyana nû ava bikin. Em ê bi ser bikevin.’’

Temellî piştre çû bernameya vekirina bûroyên hilbijartinê yên Başakşehîr û Bagcilarê.