Kurdistaniyên li paytexta Fînlandiya Helsînkiyê ji roja Duşemê ve li dijî dagirkeriya dewleta Tirk çalakiyan dikin, di rûniştina duh a parlamentê de çalakiyek ji bo Efrînê li dar xistin.

Dema rûniştina parlamentê, komek ji Kurdistaniyan ku piraniya wan ciwan bû, pankarta ji wêneyên Rêberê Gelê Kurd Abdullah Ocalan vekirin û êrîşên dewleta Tirk ên li ser Efrînê bi qîrîna dirûşman şermezar kirin.

Çalakgeran dirûşmên "Komkujiya li Efrînê rawestînin", "Kujer Erdogan", Erdogan û DAÎŞ yek in", "Azadî ji Ocalan re" qîriyan, lê hêzên ewlekariyê dest li Kurdistaniyan werdan.

Nûçegihana Ajansa Nûçeyan a Neteweyî ya Fînlandiyayê (Yle) Marîanne Sûndholm ku hingî li parlamentê bû, çalakî ji raya giştî re ragihand û vê çalakiyê cihekî berfireh di medyayê de girt.

Yle ragihand ku çalakiyên bi vî rengî yên li Parlamenta Fînlandiyayê kêm caran hatine kirin û 30 salên dawî herî zêde 4-5 caran hatine lidarxistin.

NAVBER JI RÛNIŞTINÊ RE HATE DAYIN

Ajansa Nûçeyan a Swêdê (TT) jî çalakî ji aboneyên xwe re ragihand. Di nûçeyê de hat gotin, dema ku Parlamenterê Partiya Navendî û namzetê Serokkomariyê Mattî Vanhanen diaxivî çalakî hateiy lidarxistin û Serokê Parlamentê ji neçarî ji bo demekê navber daye rûniştinê.