Li bajarê Frankfûrtê yê Elmanyayê Şehîdên Gulanê hatin bibîranîn. Çalakiya bibîranînê bi pêşengiya Komîteya Malbatên Şehîdan ên Frankfûrt, Hanaû, Offenabach hate lidarxistin û bi sedan kes tevlî bibîranînê bûn.

Axaftina destpêkê ji aliyê Komîteya Malbata Şehîdan Mûsa Agirî hate kirin. Di bibîranînê de Roja Dayîkan hate pîrozkirin.

Li ser navê TJK-E’yê jî hate gotin ku, “Divê em nirxên ku şehîdan ji me re hiştine, lê her derê mezintir bikin. Meha Gulanê ji bo PKK’ê meheke girîng e. Denîz, Îbrahîm û Hakî bûn tevgereke gel.”

‘TEVGER GIHANDIN BI MILYONAN KESAN’

Li ser navê Komawê Ahmet Aktaş jî got, “Mîrasa Hakî Karer û Mehmet Karasûngûran Tevgera Azadiyê ya Kurdan mezin kir û gihand bi milyonan kesan.”

Tûba Kemenger a ku li Rojhilat 3 birayên wê şehîd bûne jî got ku Kurd roj bi roj xurt dibin û ev bi saya serê şehîdan pêk tê.

Bi pêşengiya Navenda Civakî ya Kurd a Demokratîk a Grazê li Herrgottwîesgasseyê ji bo bibîranîna Şehîdên Gulanê tûrnûwaya fûtbolê hate lidarxistin û seyran hate kirin.

Bi sedan kes tevlî çalakiyê bûn û li ser navê HDP’ê Ahmet Zîrek, Hevserokê Civaka Azad ê Avûstûryayê Halîs Sever û li ser navê CÎK’ê axaftin hate kirin.

Di çalakiyê de bang hate kirin ku di hilbijartinê de piştgiriya HDP’ê were kirin.

Piştî axaftinan çalakî bi muzîkên Koma Medya bi dawî bû.