Kurdistaniyên li Ewropayê dijîn, kongreyên xwe pêk anîn. Li gelek bajaran jî komun hatin ragihandin.

BENSHEÎM

Kurdistaniyên li bajarokê Bensheîm ê Elmanyayê dijîn, bi beşdariya nêzî sed kesî, kongreya 4. a Navenda Civaka Demokratîk a Kurd (NCDK) a Bensheîmê lidar xistin. Rêveberên NAV-DEM'ê jî tevlî kongreyê bûn.

Di kongreyê de bal hat kişandin ser girîngiya meclîsan ji bo Kurdên li Ewropayê û hat ragihandin, di çarçoveya pêdiviyên civaka Kurd a Bensheîmê de meclîsa ji 9 komîsyonan hatiye avakirin.

Ji bo hevserokatiya meclîsê Gulsum Bîlgîç û Edîp Kaya hatin hilbijartin.

HAMBÛRG

Meclîsa Stade ya ser bi Navenda Civaka Demokratîk a Kurd li Hambûrgê, yekemîn kongreya xwe ya gel bi beşdariya 200 kesî pêk anî.

Di kongreyê de pêvajoya siyasî hate nirxandin û ji bo girtiyên di grevên birçîbûnê de ne banga xwedîderketinê hate kirin.

Ji bo meclîsa nû ya li Stade, Suheyla Akinci Erten û Îdrîs Savci weke hevserok hatin hilbijartin.

Kongre bi coşeke mezin bi qîrîna dirûşmên "Bijî Serok Apo", "Şehîd namirin" û "Jin jiyan azadî" qediya.

BONN

Li bajarê Bonn ê Elmanyayê, Meclîsa Gel a ser bi Navenda Civaka Demokratîk a Kurd, kongreya xwe ya 6. lidar xist.

PARÎS

Li herêma Les Mûreaûx a paytexta Fransa Parîsê, ciwanên Kurd Komuna Ciwanan a Şehîd Ronahî (Leyla Şaylemez) ragihandin.

Komun ji pênc komîsyonan pêk tê. Ciwanên beşdarî kongreyê bûn, soza geşkirina têkoşînê û serketinê dan.

Kongre bi qîrîna dirûşmên "Bijî Serok Apo", "Bê Serok jiyan nabe" û "Jin jiyan azadî" qediya.