Gelê ji zilma çeteyan direve xwe li YPG'ê digire

Gelê ji zilma çeteyên DAIŞ'ê direve, xwe li herêmên di bin kontrola YPG'ê de ne, digirin.

Çeteyên ku di operasyonên YPG'ê de derbên giran xwarin, zextên xwe yên li ser gel zêde dikin. Gelê li herêma sînor a di navbera Şengal û Rojava de dimîne, ji zexta çeteyên DAIŞ'ê direve û xwe li hêzên YPG'ê digirin.

Gelê sivîl ê ji zilma çeteyên DAIŞ'ê reviya diyar kir ku tevî zarokan ji her malê zilaman bi zorê kom dikin û dibin eniya şer.

Malbatek ji 3 jê jin, 1 zarok bi giştî 6 kesan, ji cihekî 12 kîlometre nêzî sînorê Rojava yê li başûrê Şengalê, ji ber gefa DAIŞ'ê reviya, xwe li YPG'ê girt. Malbat bi dizî ji herêma di bin kontrola çeteyan de reviya û ragihand ku gelek kesên li herêma jê hatine, bi gefa DAIŞ'ê re rû bi rû ne.

'GEF LI XIZMÊN ME TÊ XWARIN'

Malbata ji 6 kesan ku xizmên wan hînê li herêma di bin dagirkeriya çeteyan de ne û ji ber ewlekariya wan navê xwe aşkera nekir got, "Dema ku me xwe gihand herêma di bin kontrola YPG'ê de, mîna ku em ji nû ve ji dayik bûne, kêfxweş bûn." Malbatê destnîşan kir ku xizmên wan û gelê li herêma jê hatine, bi gef û zexta çeteyan re rû bi rû ne.

Endamên malbatê gotin, "Çeteyên DAIŞ'ê li herêmê aramî nehiştiye. Dest li jiyan û kincên her kesî werdidin. Bi zorê dikin ku mêr riya xwe dirêj bikin, nekişandina cixareyê ferz dikn. Ferz dikin ku jin çarşefa reş li xwe bikin. Dibêjin ku divê jin destên xwe jî bi lepikên reş binixumînin. Em bi dizî reviyan û ji ber ku me xwe gihandin vê derê em bi şens in."

GEL LI BENDÊ YE KU YPG WAN RIZGAR BIKE!

Malbatê da zanîn ku gelê li herêmên ne di bin kontrola YPG'ê de ne li bendê ne ku YPG bê wan rizgar bikin û ji bo gelê li zexta DAIŞ'ê rast tê got, "Eger hûn xwe bigihînin Rojava, bigihînin di bin kontrola YPG'ê de, hûn ê ewle bibin. Em bi dizî hatin. Ji ber ku me xwe gihandine YPG'ê, em gelekî bi şens in. Yekane hêza ku dikare me ji zilma DAIŞ'ê rizgar bike, YPG û YPJ ye."

Buroya Têkiliyên bi gel re ya YPG'ê, piştî dayîna pêwîstiyên wan, malbat şand cem xizmên wan ên li Til Koçer.