Di 79’emîn roja berxwedana Kobanê de li gundê Mahserê gelê ku di çalakiya nobetê de bû, zincîra ji mirovahiyê ava kir û berxwedana Kobanê silav kirin, Komeleya Xwendekarên Demokratîk a Mûşê jî diyar kir ku di şexsê Kobanê de gel hedef hatiye girtin.

Bi sedan kesên li gundê Mehserê nobet digirtin, ji bo şervanên YPJ û YPG’ê destê hev girtin û zincîra mirovahiyê avakirin, berxwedana Kobanê silav kirin. Girseya ku bi rojane li gundê Mehser û Misaynterê di nobetê de bûn, bi tevlîbûna sedan kesên ji Mûş, Êlih û Amedê didome. Welatiyan berê xwe dan, Kobanê û ji bo kesên jiyana xwe ji dest dane deqeyek rêz girtin û dirûşmên ‘Bijî Serok Apo’, ‘Silav Silav ji Kobanê re hezar silav’  û ‘Bijî Serok Apo’ berz kirin.

Piştî çalakiya zincîra mirovahiyê 60 xwendekarên ji Komeleya Xwendekarên Demokratîk a Mûşê hatin, daxuyaniyek dan. Xwendekaran pankart vekirin û dirûşm berz kirin.

Endamê MED-DER’ê Habîb Kaya daxuyanî xwend û diyar kir ku gelê Kurd bi hovîtiyeke mezin a ku nehatiye dîtin re rû bi rû ye, Kobanê dilê Rojhilata Navîne û di şexsê gelê Kurd de hedef tê girtin. Kaya bang li hemû kesî kir ku bên xeta sînor a Kobanê.